NOVAS

Ethel Vázquez destaca en Cedeira a mellora da eficiencia enerxética da depuradora

ETHEL VÁZQUEZ DESTACA EN CEDEIRA A MELLORA DA EFICIENCIA ENERXÉTICA DA DEPURADORA

A conselleira de Infraestruturas, Ethel Vázquez, visitou este luns unha actuación de mellora de eficiencia enerxética realizada na estación depuradora de augas residuais da localidade de Cedeira, que forma parte do proxecto ‘ Aqualitrans’, de cooperación transfronteiriza entre diversos organismos de Galicia e do norte de Portugal.

Durante a visita, a conselleira destacou que “o obxectivo destas actuacións é mellorar o funcionamento das estacións de depuración, no que respecta a a eficiencia enerxética, garantindo en todo momento o seu óptimo funcionamento e logrando un menor consumo, conseguindo ademais unha menor emisión de CO2”.

Ethel Vázquez realizou estas declaracións no recinto da propio depuradora, acompañada polo delegado da Xunta na provincia da Coruña, Ovidio Rodeiro e do primeiro tenente de alcalde de Cedeira, Manuel Pérez Riola (PSOE).

No caso concreto da depuradora de Cedeira, foron instalados “74 módulos fotovoltaicos que se nutren do sol e que, vía web, mesmo facilitan datos do consumo enerxético, que é sustentable, xa que non conta con baterías, co obxectivo da sustentabilidade na depuración”, dixo a conselleira.

Segundo a integrante do Goberno da Xunta, este sistema “foi instalado no pasado mes de febreiro” e, desde entón, constatouse que “que o 11% da enerxía consumida foi grazas a este sistema de produción renovable, tendo como obxectivo que este consumo nun ano sexa do 15%”.

No caso de Galicia, cinco foron as depuradoras que se beneficiaron deste proxecto, o que “permitirá nun ano a redución de 110.000 kw/ h ano e unha redución dunhas 40 toneladas de CO2.

Por outra banda, Ethel Vázquez adiantou que tamén esta previsto retocar a eficiencia deste depuradora de Cedeira, “coa adxudicación dunha mellora na propia planta e na rede de colectores”. Para iso, volveu a reclamar a colaboración das deputacións, para poder dar “auxilio económico e técnico aos concellos, sobre todo aos menores de 20.000 habitantes”, sentenciou.

Fonte: Galiciapress

IR Á LIGAZÓN DA NOVA: Ethel Vázquez destaca en Cedeira a mellora da eficiencia enerxética da depuradora

Cedeira informa da convocatoria de cursos Celga e de linguaxe administrativa na EOI de Ferrol

CEDEIRA INFORMA DA CONVOCATORIA DE CURSOS CELGA E DE LINGUAXE ADMINISTRATIVA NA EOI DE FERROL

O Concello de Cedeira informa da apertura do prazo de matrícula para asistir a cursos de linguaxe administrativa e preparatorios para os certificados de galego (Celga 3 e Celga 4) que, entre os meses de outubro do 2019 e maio do 2020, se impartirán na Escola de Idiomas de Ferrol. A participación é gratuíta e a formación tanto pode ser presencial como en liña.

No caso do Celga 3, as clases comezarán no mes de outubro e rematarán en xaneiro e serán os martes, xoves e venres en horario de 11.00 a 12.30 horas.

Pola súa banda, o Celga 4 dará comezo en febreiro e finalizará no mes de maio e o programa académico impartiranse os martes, xoves e venres no mesmo horario que o anterior.

As persoas interesadas deberán cubrir o formulario de inscrición telemática na seguinte ligazón:

IR Á LIGAZÓN formulario de inscrición telemática cursos Celga

As solicitudes cubertas adecuadamente entenderanse presentadas na secretaría da escola oficial de idiomas unha vez que se complete correctamente o proceso de matriculación.

Os prazos para apuntarse son: do 3 ao 11 de setembro, para os cursos do primeiro cuadrimestre (outubro-xaneiro), e do 30 de decembro de 2019 ao 10 de xaneiro de 2020, para o segundo (febreiro-maio).

A obtención do número para a adxudicación das prazas nos cursos do primeiro cuadrimestre realizarase en acto público o día 13 de setembro, ás 13.00 horas, na Escola Oficial de Idiomas de Lugo e, a partir do día seguinte, tamén se poderá consultar na aplicación web. As datas para a adxudicación das prazas nos cursos do segundo cuadrimestre serán o 14 de xaneiro na Escola Oficial de Idiomas da Coruña e o 15 dese mesmo mes na web.

Unha vez rematado o proceso de asignación de prazas, o alumnado seleccionado deberá presentar na secretaria da Escola Oficial de Idiomas de Ferrol a documentación que se especifica nas epígrafes sétima e décimo primeira da convocatoria.

O prazo para a presentación desta documentación será ata o día 18 de setembro de 2019 para os cursos do primeiro cuadrimestre e ata o 17 de xaneiro de 2020 para os do segundo.

A duración do programa académico será dun total de 60 horas e os cursos terán un número mínimo de 15 participantes e un máximo de 25.

A convocatoria pódese consultar na seguinte ligazón:

IR Á LIGAZÓN Convocatoria Celga

Leandro Lamas ateiga de luz e cor a ponte nova na loita do Concello contra o feísmo urbano

LEANDRO LAMAS ATEIGA DE LUZ E COR A PONTE NOVA NA LOITA DO CONCELLO CONTRA O FEÍSMO URBANO

O Concello de Cedeira vén de anunciar o remate do traballo artístico levado a cabo por Leandro Lamas nas dúas caras da ponte nova da vila, unha iniciativa máis do equipo de goberno para transformar os espazos públicos en arte urbana. Esta obra súmase ás xa executadas no auditorio, na estación de bombeo, no CEIP Nicolás del Río e mesmo nunha das paredes exteriores da biblioteca municipal.

Sobre a última, o executivo local destaca a participación dun artista consagrado como é Leandro Lamas Hermida nunha acción de goberno coa que se trata de “loitar contra o feísmo, crear museos de balde sen paredes e teitos e xerar un novo recurso cara ao sector turístico”.

A actuación que acaba de rematar tiña como obxectivo ocultar baixo unha composición artística as dúas vigas que soportan a ponte que comunica a praza do Peixe coa rúa Ponte Nova, nome polo que tamén é coñecida a devandita estrutura.

Agora, o formigón quedou solapado baixo uns debuxos moi artísticos, cheos de cor e nos que as sereas acaparan todas as olladas. Na fronte da ponte que dá á ría, dúas figuras femininas, rosadas de faciana e con colas ateigadas de formas xeométricas, serven para arroupar os versos “O norte é poema en si mesmo, é perfume e canción” dos que é autora a cantante local Guadi Galego.

Nautra viga, as sereas comparte espazo con outras personaxes que están a tocar instrumentos musicais ou se atopan enriba de animais acuáticos. As cores e os trazos volven ser a referencia artística da obra coa que Leandro Lamas vén de contribuír a transformar en luz e cor os espazos públicos e urbanos na vila de Cedeira. O artista contou coa colaboración de Abril Meizoso e Manu López Lamas para a realización deste proxecto.

O importe da obra ascendeu a un total de 5.300 euros (IVE Incluído). A devandida cantidade inclúe desde a realización de bocetos ata a man de obra e os materiais empregados.

Os roteiros e as xeorutas estarán operativas ata a segunda quincena do presente mes

OS ROTEIROS E AS XEORUTAS ESTARÁN OPERATIVAS ATA A SEGUNDA QUINCENA DO PRESENTE MES

O goberno de Cedeira estima en máis dun cento de persoas as que este ano tomaron parte no programa “Roteiros”, unha iniciativa municipal para dar a coñecer os principais recunchos da vila e que terá continuidade ata o día 19 do presente mes.

Roteiros dos Tesouros, da Vila e de San André de Teixido son os nomes que serven para identificar unha actividade que permite aos visitantes descubrir lugares de interese etnográfico e cultural como poden ser o santuario de Teixido, así como a costa cedeirense con parada no faro da Robaleira, ou a hermida de San Antón, o xacemento do Sarridal e o castelo da Concepción.

As persoas interesadas aínda están a tempo de participar nunha actividade que é de balde e para a que só é necesario apuntarse na oficina de Turismo (teléfono 981 482 187). As saídas tamén se realizan desde o devandito punto de información municipal (situado na avenida de Castelao). Desde a organización recoméndase aos participantes levar calzado de monte, bastón, auga, froita e chuvasqueiro. As distancias a percorrer oscilan entre os 18 quilómetros (ida e volta a San André) e os seis ou sete contabilizados no caso das outras dúas saídas.

O programa das Xeorutas, rutas guiadas de contido xeolóxico, tamén estará operativo ata o día 15 do presente mes. Nesta caso, as saídas previstas para a esta fin de semana son as do litoral, cantís e praias negras e para o seguinte (días 13,14 e 15) serán as dos cantís, praias negras e cromo.
A participación é gratuíta.

Cedeira acollerá os días 7 e 8 o torneo de fútbol-8, que este ano chega á súa edición número 13

CEDEIRA ACOLLERÁ OS DÍAS 7 E 8 O TORNEO DE FÚTBOL-8, QUE ESTE ANO CHEGA Á SÚA EDICIÓN NÚMERO 13

O Cedeira SD organiza para a próxima fin de semana a edición número trece do trofeo de fútbol 8, que reunirá a 550 deportistas e para a que organización conta coa colaboración do Concello local.

Un total de corenta equipos, a súa maioría procedentes da comarca, tomarán parte nunha competición que terá como escenario o campo municipal do Beco e que se desenvolverá en horario de mañá e tarde, de 10.00 a 19.30 horas.

A primeira das xornadas, día 7, está reservada á participación dos equipos de prebenxamíns e benxamíns, mentres que na do domingo xogarán os alevíns e infantís. As finais disputaranse ás 18.30 horas, tanto o sábado como o domingo. Un ano máis a organización garante o avituallamento dos deportistas e das súas familias coa venda de racións de churrasco e bocadillos nunha carpa que se habilitará a tal efecto e que estará situada a carón do recinto deportivo.

O presidente do Cedeira SD, David Abella Bouza, invita aos afeccionados ao fútbol de toda a comarca a acercarse á vila de Cedeira para seguir de cerca o campionato, do que destaca o bo ambiente que existe durante a súa celebración e a posibilidade de desfrutar do fútbol da man das novas promesas.

A obra de teatro infantil “Mai Mai” representarase este domingo no auditorio municipal de Cedeira

A OBRA DE TEATRO INFANTIL “MAI MAI” REPRESENTARASE ESTE DOMINGO NO AUDITORIO MUNICIPAL DE CEDEIRA

A compañía Baobab Teatro representará este domingo en Cedeira a obra de teatro infantil “Mai Mai”, “unha obra tenra e moi divertida onde se mestura o amor, a codicia, o éxito e a concienciación medioambiental”. O auditorio municipal acollerá unha actuación que dará comezo ás seis da tarde. A entrada é de balde.

Trátase dunha actividade do programa “Nós contra a violencia”, unha iniciativa autonómica centrada no fomento do galego e na promoción da igualdade.

“Mai Mai” é a historia do último oso panda do planeta e a súa loita por sobrevivir, a falta de comida e os problemas ocasionados polo quentamento global fan difícil a supervivencia desta especie. Unha muller forte e emprendedora e un famoso fotógrafo comezan unha viaxe por separado para atopar o último Panda do planeta, toda unha aventura na que se atoparán unha chea de problemas que solventar….

Cedeira acollerá este sábado o festival de habaneras dedicado ao compositor local “manolito”

CEDEIRA ACOLLERÁ ESTE SÁBADO O FESTIVAL DE HABANERAS DEDICADO AO COMPOSITOR LOCAL “MANOLITO”

O Concello de Cedeira rende homenaxe ao músico e compositor local Manuel Antonino García Jiménez, coñecido como Manolito, coa celebración da segunda edición do Festival de Habaneras, que será o próximo sábado na praza Floreal.

Catro serán as agrupacións que tomarán parte nesta iniciativa, que dará comezo ás 19.00 horas e será aberta ao público en xeral.

Así, as interpretacións musicais correrán a cargo das corais locais “Estrelas do Mar”, “Herbeira” e “Eixil” e da rondalla de Cedeira. Cada unha delas cantará un total de catro composicións e o Concello aproveitará o tempo de espera entre as actuacións para dar a coñecer a figura e a obra de Manuel Antonino García.

A concelleira de Cultura, Ermitas García Ríos, destacou do homenaxeado “o seu inmenso amor pola música e o seu compromiso por transmitila, o que o levou a participar no coro da igrexa, a actuar co grupo galego “Los Galaicos”, a fundar a coral Eixil e a ser director da primeira escola de música que houbo na vila”, segundo apuntou a titular de Cultura.

Ermitas García, que estes días se está a reunir con familiares e coñecidos do músico e compositor local cara ao acto do día 31, entende que “Manolito foi a semente do amor á música que a día de hoxe existe en Cedeira, xa que a súa contribución, xa fose a través da coral ou da escola, resultou ser imprescindible”.

Máis de 20 parellas xa están inscritas para casar esta fin de semana na festa de Lugnasad de Cedeira

MÁIS DE 20 PARELLAS XA ESTÁN INSCRITAS PARA CASAR ESTA FIN DE SEMANA NA FESTA DE LUGNASAD DE CEDEIRA

O Concello de Cedeira colabora na celebración da Festa de Lugnasad que este ano chega a súa décimo primeira edición e que encherá de actividades a vila durante a próxima fin de semana.

Trátase dun festexo vinculado á cultura castrexa no que se elixe á persoa, sexa home o muller, coa que se quere pasar os meses de inverno. A vixencia da unión é dun ano, aínda que tampouco existe data de prescrición.

Ata o día de hoxe xa están apuntadas máis de vinte parellas, na súa maioría galegas pero tamén do Reino Unido, Portugal e León, entre outros lugares de procedencia. A inscrición, que é gratuíta, pode levarse a cabo a través da oficina de turismo (Tlf: 981 482 187) ou no teléfono 608 292 186. É condición indispensable que os noivos veñan vestidos de época.

O programa dará comezo o venres, día 30 de agosto, co anuncio da festa, que correrá a cargo dunha parella e que arrancará pasadas as nove da tarde. Despois, a partir das 23.00 horas, celebrarase a Noite dos Druídas, que dará lugar a un encontro de druídas de diferentes clans e que rematará coa tradicional queimada. A actuación do grupo Farrapos da Ghaita porá punto final á primeira xornada do Lugnasad 2019.

Coa celebración do desfile das parellas desde o entorno da praia da Madalena ata a praza Roxa darán comezo os actos previstos para o sábado día 31. A presentación dos noivos producirase pasadas as doce do mediodía, e pola tarde, a partir das cinco, haberá xogos para que os nenos e nenas tamén participen da festa.

As cerimonias de casamento terán como escenario o litoral marítimo, serán oficiadas por Manuel Aneiros -promotor da festa- e arrancarán pasadas as 23.30 horas. A continuación, haberá unha cea de época para festexar as unións e un concerto, que estará a cargo do grupo Airoa.

Á marxe da administración local tamén colaboran deste programa a Asociación Amigos do Lugnasad, a Sociedade de Caza e Pesca Cedeira-Cerdido, a agrupación de voluntarios de Protección Civil, a Escola de Música “Vila de Cedeira”, o ximnasio Area Gym, Gadis, así como empresarios, comerciantes, artesáns e veciños da vila.

Cedeira licita por máis de 67.500 euros obras de mellora en tres camiños públicos da parroquia de Piñeiros

CEDEIRA LICITA POR MÁIS DE 67.500 EUROS OBRAS DE MELLORA EN TRES CAMIÑOS PÚBLICOS DA PARROQUIA DE PIÑEIROS

O Concello de Cedeira vén de licitar obras de mellora en tres infraestruturas viarias da parroquia de Piñeiros. Trátase dos camiños municipais do Campón, A Pasada e Hedreiros.

O orzamento de licitación supera os 67.500 euros e as previsións do executivo local pasan por contratar as obras ao longo do próximo mes de setembro coa intención de que a súa realización poida levarse a cabo antes do inverno. O prazo de execución dos traballos é inferior aos dous meses.

O proxecto consiste na reparación dunhas estruturas viarias que a día de hoxe presentan distintas deficiencias. A reparación se levará a cabo mediante tratamentos asfálticos e selado en toda a superficie, así como na limpeza das gabias e na aplicación dunha capa de macadam nos tramos que se atopen en peor estado de conservación.

No seu conxunto, serán máis de 2,5 quilómetros de reformas coas que se busca mellorar a seguridade viaria de condutores e peóns e mesmo a comunicación polo territorio.

Néstor López Casas foi o gañador da quinta edición do concurso de pintura rápida “vila de Cedeira”

NÉSTOR LÓPEZ CASAS FOI O GAÑADOR DA QUINTA EDICIÓN DO CONCURSO DE PINTURA RÁPIDA “VILA DE CEDEIRA”

Un total de 20 artistas tomaron parte onte no concurso de pintura rápida organizado polo Concello de Cedeira, do que este ano resultou gañador Néstor López Casas, de Xixón, cunha obra na que se recolle un tramo do peirao da localidade.

O segundo premio foi para Carlos Espiga (Bilbao) -que optou por reproducir unha serie de embarcacións no porto perqueiro-, mentres que Benigno Rodríguez Sánchez (Xixón) se fixo con terceiro cunha paisaxe da ría. A organización do certame recaeu na concellería de Cultura. A súa titular, Ermitas García Ríos, presidiu acto de entrega de premios, no que destacou o elevado nivel das obras presentadas e o éxito dunha convocatoria que chegou este ano a súa quinta edición. O xurado estivo integrado polos pintores Adrián Taracido e Jane Danko e pola propia concelleira de Cultura.

O Concello repartiu entre os premiados un total de 1.800 euros, de maneira que o primeiro recibiu 800; o segundo 600 e o terceiro 400, ademais dos correspondentes diplomas.

Andrés Gabarres Cagiao foi o gañador da anterior edición dun certame aberto á participación de afeccionados e profesionais da pintura e co que se busca mostrar diferentes realidades dos recunchos máis coñecidos da vila de Cedeira. As obras premiadas pasan a ser propiedade do Concello.