Skip to content Skip to left sidebar Skip to footer

NOVAS

ABERTA A INSCRICIÓN NO PROGRAMA INTEGRADO DE EMPREGO

Mulleres desempregadas dos municipios de Cedeira, Valdoviño, Narón, Fene, Neda, Cabanas, Mugardos e Ares poden inscribirse xa no Programa Integrado de Emprego de Galicia 2021/2022, organizado pola Mancomunidade de Concellos de Ferrol e financiado pola Xunta e o Servizo Público de Emprego.

Está dirixido a persoas con certificado de discapacidade, en risco de exclusión social, vítimas de violencia de xénero, menores de 30 anos con baixa cualificación e estar actualmente en situación de desemprego.

Fonte: La Voz de Galicia

ENLACE A NOTICIA Aberta a inscrición no programa integrado de emprego

ADXUDICADA A REORDENACIÓN DA PRAZA 18 DE DECEMBRO POR UN PRESUPOSTO DE MÁIS DE 270.000€

O Concello de Cedeira adxudicou por 272.022,71€ (IVE incluído) a obra de reorganización da Praza 18 de Decembro, coa que se dotará este espazo público dunha pérgola diáfana e parcialmente pechada, con bancos nos que poderá sentar a veciñanza ao abrigo dos ventos predominantes na zona. Tal como recordou o alcalde, Pablo Diego Moreda Gil, “é un lugar moi frecuentado por persoas maiores, que sentan alí para conversar e pasar un tempo de lecer, e as obras van servir para humanizalo e facelo máis habitable durante os meses de inverno, gañando espazo para as persoas”.

A Praza 18 de Decembro, anteriormente denominada Praza de Galicia, está situada na confluencia da rúa José Pascual López Cortón, o Camiño Real da Madalena e a Avenida Castelao (estrada AC-566). A unión temporal de empresas formada por Meraki CR e Carpintería Metálica Ferreiro resultou adxudicataria da actuación, que ten un prazo de execución de seis meses e que conta con financiamento do programa provincial POS+2020.

Os traballos consistirán na reordenación destes espazo público, dotándolo dunha zona de estar, que estará protexida pola devandita pérgola e na que se instalarán bancos. Haberá tamén zonas axardinadas. Manteranse os catro magnolios que hai nas catro esquinas da praza e plantaranse outras árbores e arbustos de medio porte, especialmente concentrados na zona norte para mellorar o aillamento do espazo para o esparcemento. O proxecto comprende tamén a creación duns paseos e percorridos peonís que comunicarán coas vías perimetrais, reducindo a superficie destinada a aparcadoiro.

O proxecto aprobárase inicialmente polo pleno da corporación de Cedeira a finais de 2019, porén foi necesario facer unhas modificacións tras a supervisión técnica da Deputación. Tamén foi a finais do mesmo ano cando o Concello acordou por unanimidade cambiar o nome deste espazo público, antes chamado Praza de Galicia e tamén “dos cabalos”, para poñerlle 18 de Decembro en memoria do asasinato no castelo de San Felipe, en 1936, de 13 cedeireses entre os que estaba o alcalde e varios membros da corporación.

O CONCELLO LICITA OBRAS DE CONSERVACIÓN DO FIRME NA AVENIDA DE ESPAÑA E CAMIÑO DE PITILLEIRA

O Concello de Cedeira acaba de sacar a concurso, a través da súa publicación na Plataforma de Contratación do Sector Público, a obra de “Conservación do firme na Avenida de España e o Camiño de Pitilleira”. A actuación ten un prezo de licitación de 51.649,94€ (IVE incluído) e é o terceiro e último proxecto incluído este ano no capítulo de investimentos do programa provincial POS+21, ao que tamén se acollen as obras de adecuación do anel da Praza Roxa e as reformas nos antigos escolares de Saa e Sisalde que están actualmente en execución.

A mellora do firme na Avenida de España abranguerá o tramo comprendido entre a rúa Cerdido e o Polideportivo Municipal, mentres que no Camiño de Pitilleira a intervención afectará, por unha parte, ao treito que vai desde a Avenida de España ata a de Castelao, e por outro, ao treito que perdorre desde a Avenida de España ata Floreal.

A actuación vai dirixida a renovar o pavimento, que se atopa deteriorado, colocando unha nova capa de aglomerado asfáltico de seis centímetros de grosor. Está prevista tamén a adecuación dun paso elevado para peóns na intersección entre a Avenida de España e Pitilleira.

As empresas interesadas poden presentar ofertas ata o vindeiro día 10 de decembro. O prazo de execución será de dous meses.