Skip to content Skip to left sidebar Skip to footer

NOVAS

A EXPERIENCIA DOS ORZAMENTOS PARTICIPATIVOS DE CEDEIRA, NAS XORNADAS DE CIDADES AMIGAS DA INFANCIA

Carme López López, Mailén Marín Fernández e Martín Gutiérrez Couto representaron este mércores ao Consello Local de Infancia e Adolescencia de Cedeira nas V Xornadas Formativas de Cidades Amigas da Infancia que se celebrou en Santiago de Compostela, organizadas pola EGAP e Unicef. Os tres tomaron a palabra para expoñer a experiencia do desenvolvemento dos orzamentos participativos na súa vila, unha tarefa que o Concello pon cada ano en mans de alumnado de Secundaria do IES, nunha mesa na que tamén interviron representantes de entidades homólogas de Moeche e Viveiro.

Na súa intervención, Carme López, Mailén Marín e Martín Gutiérrez explicaron o proceso de desenvolvemento dos orzamentos participativos de Cedeira e o interesante que resultou coñecer como é a tramitación de calquera actuación por parte dunha administración local, “e ver que pode resultar máis complicado do que parece nun principio”. Expresaron tamén a emoción de ver que o esforzo realizado na elaboración destes presupostos deu froitos reais, “porque quen vai cambiar o mundo se non o fai a xuventude?”.

O CLIA de Cedeira, recén constituído o pasado novembro, participara tamén este mes no Foro da Infancia que Unicef celebrou no Parlamento de Galicia.

ABERTO O PRAZO DE INSCRICIÓN PARA O PROGRAMA INTEGRADO DE EMPREGO DA MANCOMUNIDADE DE CONCELLOS DA COMARCA DE FERROL 2023 – 2024

Financiado pola Consellaría de Emprego e Igualdade e mais polo Ministerio de Traballo e Economía Social, está organizado pola Mancomunidade de Concellos da Comarca de Ferrol.

Dirixido a:

  • Mulleres dos concellos de Ares, Cabanas, Cedeira, Fene, Mugardos, Narón, Neda e Valdoviño que estean desempregadas e inscritas na oficina de emprego.
  • Os colectivos que se atenderán son mulleres desempregadas dos concellos citados que estean nalgunha das seguintes situacións:
    • Muller desempregada, en xeral
    • Con discapacidade
    • En risco de exclusión social ou beneficiarias do tramo de inserción da RISGA
    • Vítima de violencia de xénero
    • Menores de 30 anos co baixa cualificación

Accións que se desenvolverán (entre outras):

  • Información, orientación e asesoramento
  • Formación para o emprego: Limpeza industrial, Comercio e loxística, Cociña, Agricultura ecolóxica, Xestión de comunidades virtuais e Preelaboración e venda de peixes, crustáceos e mariscos. Ademais desta formación podería impartirse outra relacionada con outras ocupacións (dependendo, entre outros aspectos, do perfil e preferencias das usuarias seleccionadas).
  • Formación transversal (talleres de Busca de emprego, Manipulación de alimentos, Habelencias sociais, Alfabetización informática, Internet e redes sociais, Ferramentas de coaching, Inglés…
  • Prospección empresarial
  • Emparellamento de ofertas de traballo coas demandantes
  • Prácticas profesionais non laborais en empresas

Bolsa de 10€ por día de asistencia ás accións

Medidas de conciliación

Obxectivo de inserción: 35%

Máis información en https://comarcaferrolterra.wordpress.com/

Prazo: ate o 12 de xaneiro de 2023

O DELEGADO DO GOBERNO CONFIRMA EN CEDEIRA A PRÓXIMA LICITACIÓN DA REXENERACIÓN DA MADALENA

O delegado do Goberno en Galicia, Pedro Blanco Lobeiras, visitou onte a praia da Madalena de Cedeira acompañado do alcalde, Pablo Diego Moreda Gil e do primeiro tenente de alcalde, José Antonio Rodríguez. No encontro, o responsable confirmou que o Ministerio para a Transición Ecolóxica e o Reto Demográfico ten listos os pregos do expediente de licitación do proxecto de rexeneración do areal e que a actuación está orzamentada. Segundo informou, sairá a concurso o vindeiro ano cun presuposto de 2.362.615,65€ (IVE incluído) e poderá executarse despois do verán para non interferir coa época de máis afluencia.

“Actuacións na morfoloxía da praia da Madalena” é o título desta ambiciosa actuación coa que se vai terminar de xeito definitivo coa degradación do areal e o retroceso da liña de costa. Culminará, coa execución deste proxecto, un proxecto que se comenzou a perfilar no mandato do PSOE e o BNG de 2015 e 2019 e do que foron cumpríndose fitos nos últimos anos. Así, en febreiro de 2019 saíu a licitación a redacción do proxecto e o estudio de impacto ambiental, que se someteron a exposición pública en 2021. A pandemia ralentizou o proceso e foi xa en abril de 2023 cando o Ministerio publicou a declaración de impacto ambiental, quedando pendente só a contratación da obra.

Para corrixir os problemas e a degradación que a praia da Madalena sofre desde finais da década dos noventa, construirase un espigón de 77 metros que asegurará a estabilidade da liña de costa fronte aos fenómenos erosivos. Xunto a ese obxectivo de devolver a estabilidade á Madalena, no proxecto prevese a reconstrución do sistema dunar e a súa repoboación con vexetación autóctona, conservando e potenciando a diversidade deste espazo e dos colindantes, incluída a Reserva Mariña de Interese Pesqueiro Ría de Cedeira. A actuación servirá tamén para mellorar o encauzamento da desembocadura do río Condomiñas e do regato da Veiga.

Cómpre recordar que o Ministerio para a Transición Ecolóxica custeou tamén, a través de Demarcación de Costas, a recuperación das cetarias do Sarridal. O alcalde, Pablo Diego Moreda Gil, agradeceu a visita e celebrou a próxima licitación do importante proxecto para a praia da Madalena.