MOCIDADE

Cedeira acolle mañá sábado o campionato galego de triatlon, que reunirá a 320 participantes

CEDEIRA ACOLLE MAÑÁ SÁBADO O CAMPIONATO GALEGO DE TRIATLON, QUE REUNIRÁ A 320 PARTICIPANTES

A vila de Cedeira acollerá por terceira ocasión o Campionato Galego de Triatlón, que será mañá sábado e no que participan un total de 320 nenos e nenas con idades comprendidas entre os dez e dezasete anos.

O Concello colabora economicamente na celebración do evento deportivo e pon a disposición da organización a cesión de instalacións e o traballo de axentes da Policía Local, membros de Protección Civil e traballadores municipais para garantir o normal desenvolvemento das probas, que darán comezo ás 13.05 horas e que terán lugar no contorno da praia da Madalena. Tamén contribúen con empanadas, mantecadas e outros agasallos a Panadaría Arribi e Gadis e Eroski con produtos para o avituallamento dos rapaces e rapazas.

A competición, que chega este ano a súa sexta edición local, dará lugar a probas de natación, bicicleta e carreira cuxos percorridos estarán en función da idade dos participantes. No caso da natación, a distancia será de 100 metros para os benxamíns e de 750 metros para os cadetes, mentres que na proba ciclista os máis novos pedalearán durante 2 quilómetros e os maiores un total de dez. As lonxitudes ás que se enfrontarán os participantes na proba da carreira oscilan entre os 500 metros e os 2,5 quilómetros.

A organización repartirá trofeos entre os tres primeiros clasificados, tanto a título individual como por equipos.

O goberno de Cedeira quere agradecer publicamente á organización a promoción deportiva que no ámbito local fai coa celebración dunha proba destas características, así como o traballo desinteresado dos voluntarios que veñen colaborando desde hai días para telo todo a punto cara ao día de mañá. Por outra banda, pídense desculpas aos veciños e visitantes polas incomodidades que poidan derivarse do desenvolvemento do campionato e tamén precaución por tratarse de competicións que requiren moito movemento de persoas e mesmo de vehículos.

Comezaron as obras de ampliación e reforma da escola infantil da rede a galiña azul en Cedeira

COMEZARON AS OBRAS DE AMPLIACIÓN E REFORMA DA ESCOLA INFANTIL DA REDE A GALIÑA AZUL EN CEDEIRA

O alcalde de Cedeira, Pablo Moreda Gil, e máis o xerente do Consorcio Galego de Servizos de Igualdade e Benestar, Perfecto Rodríguez, participaron onte na firma da acta de replanteo das obras de ampliación e reforma da escola infantil da localidade. A actuación aumentará en 20 o número de prazas ofertadas para nenas e nenos de 0 a 3 anos, polo que pasará de 58 a 78.

Este acto supón o anuncio do inicio inmediato das obras, cun investimento total previsto de máis de 141.000 euros. Deles, o Consorcio -que xestiona o centro- desembolsará 100.000 euros (cunha achega do 80% procedente de Fondos Feder da Unión Europea), mentres que o montante restante corresponderalle ao Concello de Cedeira. Da actuación encargarase a empresa Prace Servicios y Obras S.A. cun prazo de execución máximo de seis meses.

As obras se levarán a cabo sen alterar o funcionamento ordinario do centro. Aproveitarase o mes de agosto no que a escola permanece pechada por vacacións para levar a cabo os traballos mais complexos e que a intención é que as actuacións rematen antes do Nadal.

Ademais das intervencións propias da ampliación, executaranse outras actuacións de mellora entre as que se atopan o incremento do espazo das aulas, a reforma completa da cociña e a instalación dun sistema de ventilación natural na área de descanso para menores de 0 a 1 anos. Tamén se dotará ás instalacións de novos elementos de protección no desnivel interior que existe entre plantas.

A Xunta e o Concello asinaron en xullo do pasado ano o convenio de colaboración para levar a cabo este proxecto de ampliación, para o que a administración local cedeu o edificio anexo á escola. A intervención mellorará a calidade da prestación do servizo nesta escola infantil que facilita a conciliación ás familias deste concello e da súa contorna.

Cedeira promove cinco actividades distintas ao longo desta semana para celebrar o Día das Letras Galegas

CEDEIRA PROMOVE CINCO ACTIVIDADES DISTINTAS AO LONGO DESTA SEMANA PARA CELEBRAR O DÍA DAS LETRAS GALEGAS

A celebración do Día das Letras Galega en Cedeira dará lugar a cinco actividades distintas que terán como punto de partida hoxe xoves cunha representación teatral e rematarán o luns 20 cunha función teatral protagonizada por escolares. A festa desde ano está dedicada ao escritor pontevedrés Antón Fraguas.

A primeira cita, que será ás 20.30 horas no auditorio municipal, consistirá na representación da obra “Os romeiros do caracol” que, baseada nun estudio realizado por Fraguas sobre as festas populares, correrá a cargo de “Fantoches Baj”. Trátase dun espectáculo familiar, de 50 minutos de duración, que recrea a volta a casa de dous irmáns despois de cumprir a ofrenda que lle prometeron ao seu defunto avó de levalo a San Andrés de Teixido en forma de caracol, xa que non fora de vivo. Monicreques, cartel de cego, máscaras e reque-reque son algúns dos recursos do teatro popular que forman parte dunha actuación con música en directo interpretada polo acordeón diatónico de Carlos Quintá.

A fonte da Pixana acollerá mañá venres, día 17, o acto institucional, que comezará ás 12.30 horas e dará lugar a unha semblanza de Antón Fraguas, á lectura de poemas a cargo de alumnado do CEIP Nicolás del Río e a unha actuación musical. A Festa dos Maios, organizada pola Asociación de Maiores de Cedeira, será o sábado 18 no auditorio municipal e arrancará ás 20.00 horas.

O mundo da escena tornará ao día seguinte ao auditorio de Cedeira coa representación da obra “Fillos do Sol” a cargo da compañía Contraproducións. Trátase dunha elucubración teatral sobre a figura de Eduardo Pondal e a súa obsesión coa obra que lle ocupou toda a súa vida: “As Eoas”. A cabalo entre a realidade ficcionada e a fabulación dramática, o poeta de Ponteceso confronta a súas dúbidas, medos e insatisfaccións creativas tendo como interlocutores a un personaxe nado das súas perturbacións e a criada da pensión na que está a vivir.

Os alumnos e alumnas do IES Punta Candieira volverán representar esta obra o luns día 20 e de novo será no auditorio municipal. A función dará comezo ás 12.30 horas.