Skip to content Skip to left sidebar Skip to footer

MOCIDADE

O CONCELLO DE CEDEIRA E A ASOCIACIÓN CONTRA O CANCRO ORGANIZAN UNHA ANDAINA SOLIDARIA O VINDEIRO DOMINGO, 9 DE XULLO

O concello de Cedeira e a Asociación Española contra o Cancro en Cedeira únense para realizar unha andaina solidaria o vindeiro domingo, 9 de xullo, coa que recadar fondos para a investigación contra esta enfermidade. A ruta fará un percorrido circular de aproximadamente unha hora de duración, con saída desde a praza Roxa ás 11 horas.

As inscricións poden facerse de forma presencial en Regalos Rosa (R/ Ezequiel López, 2) ou na oficina de Turismo (Av. Castelao, 18) ata o día previo, e o mesmo día da actividade nas carpas da asociación na praza Roxa a partir das 9.00 horas. O prezo do dorsal para os adultos é de 5€, e o dos nenos, ata 12 anos, de 3€. De forma online é posible apuntarse a través de https://cutt.ly/1wubs6OI. As persoas que non poidan acudir ao evento e queiran colaborar poden adquirir un “dorsal solidario” a través desta mesma web.

A andaina desenvolverase por un percorrido sinxelo de completar para todas as idades, saíndo desde praza Roxa cara o paseo marítimo, seguindo polo Beco, a Area, a Xunqueira, o paso fluvial de A Ponte Nova e volta á praza Roxa. O evento comezará cun quecemento con exercicios de zumba, guiado por unha monitora, que se encargará de motivar e preparar aos participantes. Esta actividade, a segunda deste tipo que se celebra en Cedeira (a primeira foi no 2019) pretende concienciar e dar visibilidade á enfermidade, así como promocionar o exercicio físico e os hábitos de vida saudables. Ademais, nas carpas da Asociación contra o Cancro que se instalarán na praza Roxa con motivo da andaina será posible mercar camisetas e outros artigos promocionais cos que contribuír á investigación contra o cancro.

O CONCELLO PON EN MARCHA O PROGRAMA DE VERÁN “DE RUTA”

O Concello de Cedeira pon en marcha durante o próximo período de vacacións de verán o programa ”De Ruta” con saídas guiadas a pé polos excepcionais paisaxes do municipio. As saídas que serán os días 5, 7, 12, 14, 19, 21, 26 e 28 de xullo, todas de balde e cun límite máximo de 15 participantes.

O programa “De Ruta” comezará o mércores 5 de xullo cun percorrido ao faro de Robaleira. Será unha saída de 8km, de dificultade baixa/media e que se realizará nunhas catro horas, con saída desde a oficina de turismo ás 10.00 da mañá. O itinerario será circular, parte del polo sendeiro que vai desde as vellas fábricas de San Isidro ao faro. Unha vez alí o grupo poderá ver a antiga cetaria, a cala Mi Señora e gozar coas vistas da ría de Cedeira. A volta realizarase polo camiño que leva da praia das Cerdeiras ao Barral. Poderase facer esta ruta tamen os días venres 14 e mércores 26 de xullo.

Para o venres 7, mércores 19 e venres 28 de xullo, a proposta é unha ruta polos Altos de Santo André. Serán tamén 8km dunha dificultade técnica baixa/media, pero con saída desde o mirador dos Carrís ás 10.00 da mañá, e o percorrido irá pola Serra da Capelada e permitirá gozar coas vistas dos cantís de Santo André de Teixido, a Vixía de Herbeira e as rías de Ortigueira e Cedeira.

O mércores 12 e o venres 21 de xullo, farase un percorrido circular no entorno de Punta Candieira, cubrindo unha distancia de 9km que, se estima, levará catro horas. O punto de encontro será no mirados de Punta Candieira ás 10.00 horas.

As persoas interesadas teñen que realizar a súa inscrición no Polideportivo Municipal, ou ben chamando ao número 981 482 633 ou enviando un mail a polideportivocedeira@gmail.com.

O CONCELLO FELICITA AOS CLUBES DE REMO E TRIATLÓN DE CEDEIRA POLOS ÉXITOS ACADADOS

O goberno local de Cedeira quere expresar as súas felicitacións para os e as deportistas dos clubes Remo e Natación Cedeira, que nos últimos días obtiveron excelentes resultados en senllos campionatos de España. O seu esforzo é un orgullo e un exemplo para o pobo de Cedeira, un modelo de superación a seguir.

Rotundo éxito o acadado polo Club de Remo Cedeira no Campionato de España de remo olímpico, que o pasado fin de semana se disputou no embalse de Banyoles, en Girona. A entidade acadou un histórico sexto posto na clasificación por equipos de entre un total de vinte tres participantes, sendo, ademais, o mellor de entre os representantes galegos.

Este éxito colectivo alimentouse cunha brillante actuación individual de varios dos seus botes, que reportou dous títulos nacionais: un para Raquel Rodríguez Pernas, na proba de skiff sub 23; e outro para a tamén skiffista Candela Martínez Pernas, neste caso na categoría xuvenil. A estes dous ouros hai que engadirlle a medalla de prata do doble scull xuvenil masculino formado por Iván e Bruno e o bronce acadado pola propia Raquel Rodríguez Pernas na categoría absoluta de skiff feminino.

Cabe salientar tamén que outros tres botes cedeireses acadaron as finais. Agus González e Iago Ortiz rozaron o podio co seu cuarto posto no doble scull cadete masculino; mentres que na modalidade individual de skiff Raúl López foi décimo en sub 23 e Lucía Bellas duodécima en cadete.

Estes éxitos ratificaron a presenza internacional tanto de Candela Martínez, en categoría xuvenil, como Raquel Rodríguez, en sub 23, que foron convocadas de novo para as concentracións dos equipos nacionais que prepararán os Mundiais Sub 23 de Plovdiv e Xuvenil de París.

O Natación Cedeira tamén pechou unha fin de semana de grandes éxitos en competicións nacionais. Os seus deportistas Fran Bellas, Juan Piñón, Samuel Sánchez, Lucas Riola e Manuel Muiño foron segundos no Campionato de España de Triatlón Contrareloxo por equipos, que se disputou o sábado, mentres que Suárez, Piñón e Riola foron primeiros no Campionato de España de Triatlón por Relevos ao día seguinte.