Skip to content Skip to left sidebar Skip to footer

MOCIDADE

O Entroido en Cedeira levará a festa ás rúas cun programa de actividades organizado polo Concello

Cedeira prepárase para celebrar o Entroido co programa de actividades organizado polo Concello que, segundo as previsións meteorolóxicas, vai vir acompañado de bo tempo.

Desde o equipo de goberno convídase á veciñanza a sumarse ás celebracións pero mantendo a moderación e o respecto para que sexan unhas festas divertidas e compartidas, sen incidentes e sen ocasionar danos en bens e propiedades públicas.

O calendario dará comezo hoxe sábado co desfile do Entroido, que sairá ás 17.00 da praza Roxa para rematar no pavillón polideportivo, donde terán lugar as actuacións e o acto de entrega dos premios do concurso, no que se repartirán 2.205 euros. Esta primeira xornada rematará cunha verbena amenizada pola orquestra Metrópolis, que será na praza Roxa e que dará comezo ás 23.30 horas.

A festa infantil será o luns 24 e terá lugar no pavillón polideportivo. A organización informa de que haberá inchables, animación e actividades para que as nenas e nenos gocen destas primeiras citas festivas do ano. O peche da xornada virá da man da orquestra Trovadores, que actuará a partir das 23.30 horas na praza Roxa.

As celebracións do Martes de Carnaval consistirán nunha batukada, ás 17.00 horas, a cargo do grupo da Asociación Cultural Discalz@s, e nunha feira de xogos na Praza Roxa. Esta última cita dará comezo ás 18.00 horas.

Co Enterro da Sardiña, previsto para a xornada do día 29, rematará a programación de Entroido. A despedida do defunto dará comezo ás 19.00 horas na praza da Marieta e rematará no auditorio municipal coa lectura de coplas.

Máis de mil persoas esixen en Cedeira a restitución do servizo de pediatría

O pobo de Cedeira, aos berros de “En Cedeira pediatra XA” e “Pagamos impostos, queremos servizos”, saíu onte á rúa para esixir a inmediata restitución do servizo de atención pediatría vinculado ao centro de saúde da localidade.

A convocatoria que partiu da plataforma cidadá “En Cedeira pediatra Xa” e que conta co apoio explícito do equipo de goberno, reuniu a máis de 1.000 persoas nun acto reivindicativo que deu comezo ás 12.30 horas no centro de saúde e rematou pasada a unha da tarde na praza Roxa coa lectura dun manifesto.

O alcalde de Cedeira, Pablo Diego Moreda Gil, valorou a masiva participación, “hoxe máis que nunca síntome orgulloso do pobo de Cedeira”, ademais de estimar que se tratou da mobilización máis numerosa das celebradas nos últimos vinte anos. Moreda considerou que “o poder do pobo é imparable” e asegurou que se trata dunha reivindicación xusta “polo que non imos parar ata que desde a Xunta de Galicia non se lle de unha solución”.

Neste sentido, tamén se pronunciou Davide Loimil, membro da plataforma cidadá, quen calificou de “éxito” a mobilización e sobre a que destacou a implicación conxunta de todo o pobo de Cedeira. Loimil entende que “a Xunta ten que traballar para darlle solución ao problema” e asegurou que “non pararemos ata que se garanta o dereito das nosas fillas e fillos a recibir atención pediátrica no centro de saúde”.

Pala súa banda, a portavoz do BNG na corporación, María Xosé Rodríguez, destacou o éxito da convocatoria e sinalou a intención do Bloque a implicarse na reivindicación da plataforma “porque está fundamentada” e porque “desde a Xunta estanse a facer moi mal as cousas en canto á sanidade e a atención primaria en particular”.

Descarga PDF manifesto da plataforma cidadá “En Cedeira pediatra Xa”.

O Concello organiza un ano máis os obradoiros de manualidades, debuxo, pintura e tapices

O Concello de Cedeira vén de abrir o prazo de inscrición para as persoas interesadas en participar nos cursos gratuítos de debuxo, pintura, manualidades e tapices. As clases, que darán comezo a semana próxima serán impartidas por Andrés Urrutia, no caso do obradoiro de debuxo e pintura, e Fernando Villoslada e Xavier Rodríguez nos de manualidades e tapices, respectivamente.

Os interesados xa poden formalizar as reservas de prazas na oficina de turismo (Palacete Municipal), ou no teléfono 981 482 187.

As clases de debuxo e pintura terán lugar no 3º andar do edificio sindical de Cedeira os luns e martes de 10.00 a 13.00 h, e os xoves de 18.30 a 21.00h, e no CEIP Nicolás del Río os venres de 16.00 a 18.00 h para estudantes do centro. Os mércores, as clases impartiranse en Santalla de 16.00 a 21.00 horas. Os xoves tocaralle o turno a Esteiro de 10.30 a 12.30h, e no mesmo horario os venres as clases impartiranse en San Román. Os vecinos e veciñas da parroquia de Montoxo terán as clases de pintura os venres pola tarde de 18.00 a 20.30 horas. As clases nas parroquias impartiránse nos respectivos locais sociais.

Pola súa banda, o de manualidades, que se impartirá os martes e venres de 19.00 a 21.00 horas, terá como referencia os baixos da praza da Rectoral e inclúe modelaxe de barro-escaiola-xeso, elaboración de moldes e restauración. E o Palacete Municipal acollerá as clases de elaboración de tapices, que serán os luns en dúas quendas, de 10.00 a 13.00 h e de 16.00 a 19.00 horas.