Skip to content Skip to left sidebar Skip to footer

MOCIDADE

O CONCELLO EMPRENDE A PRIMEIRA EXPERIENCIA DE ORZAMENTOS PARTICIPATIVOS CO IES PUNTA CANDIEIRA

O Concello de Cedeira vai lanzar este mes de novembro o seu primeiro proxecto de orzamentos participativos co alumnado de cuarto de ESO do IES Punta Candieira. O alcalde, Pablo Diego Moreda Gil, recordou que a iniciativa responde “ao compromiso do goberno local de abrir as portas da administración municipal a este tipo de procesos, nos que a cidadanía ten un papel activo e directo na decisión sobre en que se gastan os recursos públicos” e destacou que esta experiencia piloto “vai ser vinculante, é dicir, vaise traducir xa este ano na participación real dos rapaces e rapazas cedeiresas no próximo presuposto do seu Concello, porque incorporaremos as súas propostas”.

En concreto, a mocidade cedeiresa decidirá onde se invisten 20.000€ do próximo orzamento municipal da súa vila.

O programa comezará en novembro con diferentes sesións informativas e de debate nas aulas. O profesorado e a dirección do IES Punta Candieira, así como as familias dos mozos e mozas que protagonizarán esta experiencia piloto, están informados e implicados no seu desenvolvemento.

Segundo explicou a concelleira de Participación Cidadá, Carmela Prieto, o plan de traballo abrangue desde novembro a febreiro. A través desta experiencia, o alumnado achegarase ao funcionamento do Concello, aos seus órganos de decisión e á organización das diferentes áreas de xestión.

En primeiro lugar debatirán sobre as necesidades da súa vila, para a partir diso chegar a elaborar propostas. O persoal técnico do Concello tamén vai implicarse na iniciativa, tanto para verificar que as propostas son viables económica e xuridicamente como para explicar ao alumnado o itinerario que segue unha proposta ata a súa execución. Finalmente as propostas votaranse en asemblea.

O programa vai seguir a metodoloxía da “Cidade dos Nenos/as” do pedagogo Francesco Tonucci, convertindo ao alumnado en protagonista no deseño de actuacións públicas, e os postulados da Convención Internacional dos Dereitos do Neno, que no seu artigo 12 contempla a necesidade de expresar opinións naquelas decisións que lles afecten e telas en conta.

Para o desenvolvemento do proxecto, o Concello contratou á consultora Goodlife Factory.

O CONCELLO ACLARA QUE A ASOCIACIÓN ESCOLA DE MÚSICA VILA DE CEDEIRA NON TEN ÁNIMO DE LUCRO

O Concello de Cedeira quere aclarar que a Asociación Escola de Música Vila de Cedeira é unha entidade sen ánimo de lucro e que non ten, e así o acredita cada ano a través da presentación das súas contas anuais, beneficios derivados das súas actividades. Co ánimo de corrixir unhas estimacións feitas públicas polo PP local, desde o goberno local, a concelleira de Cultura, Ermitas García, explicou que a concesión da axuda municipal para o funcionamento da escola está suxeita a esta condición e garantiu que a entidade cumpre escrupulosamente ano a ano toda a normativa vixente para o cobro da subvención.

Ermitas García recordou tamén que o Concello de Cedeira, a través da Concellería de Servizos Sociais, concede axudas económicas para garantir que todas as familias de Cedeira poden ter acceso á práctica das actividades culturais e deportivas que forman parte da oferta municipal. A edil destacou “o importante labor das asociacións que promoven e xestionan tantas actividades culturais en Cedeira, facendo desta vila un microuniverso de cultura e pensamento”.

Tal como se informou recentemente, o Concello de Cedeira aprobou un novo convenio coa Asociación Escola de Música.O importe total da subvención é de 111.000€ repartidos en 9.450€ no que queda deste 2020, 37.000€ para cada un dos anos 2021 e 2022 e 27.750€ para o período de xaneiro a xullo de 2023. Desde o goberno local indican que o orzamento anual de gastos da escola é de 89.800€ e subliña que as contas da asociación fanse públicas.

A administración local fixo a convocatoria por concorrencia competitiva e a devandita entidade foi a única que presentou o seu proxecto.

O CONCELLO INVITA Á VECIÑANZA A ENCHER A VILA DE CABAZAS TEBROSAS E GOZAR DUN SAMAÍN DIFERENTE

O Concello de Cedeira invita á veciñanza a gozar do Samaín dunha maneira diferente, desta volta sen xuntanzas nin a tradicional exposición, para cumprir coa tradición ao tempo que mantemos a distancia e todas as medidas de prevención recomendadas polas autoridades sanitarias. A concelleira de Cultura, Ermitas García, explicou que este ano as casas van ser o núcleo da festa e invitou a tallar as cabazas ou os melóns en familia para poñelos durante a tarde-noite do sábado 31 nas portas ou nas fiestras, cunha candea que as ilumine e lles dea o seu aspecto arrepiante.

A edil animou a todos os veciños e veciñas a participar un ano máis na festa e colaborar para encher Cedeira de cabazas, ao tempo que animou a facer colares de zonchos e saír con eles na tarde-noite do sábado, respectando as distancias e por suposto o límite horario, para gozar da fermosa imaxe que vai ofrecer a vila. Tamén desde o Concello se fai un chamamento a facer fotos e compartilas nas redes sociais co hashtag #cabazassamain2020.

O programa, ao marxe disto, ofrece dúas citas para o público familiar. O Auditorio Municipal acollerá este venres, ás 20.00 horas e coa colaboración da Deputación, o espectáculo “Pakolas en concerto”. No mesmo lugar o domingo, ás 12.30 horas, vai actuar “Xan Perillán e a maleta máxica”, unha actividade programada coa colaboración de Política Lingüística da Xunta.

 

Mural

Por outra parte, a concelleira Ermitas García informou de que o goberno local vai facer unha homenaxe ao Samaín na próxima acción do programa de “arte na rúa” ou “street art”. A artista Laura Recio Hidalgo (@aole.ilustra en Instagram) será a encargada de pintar un mural nunha parede situada na Rúa da Cruz número 13, un lugar polo que tradicionalmente vai a ruada das pantasmas.

A concelleira explicou que o Concello xa conta co permiso dos propietarios e que proximamente será realidade este mural, confiado á ilustradora e deseñadora madrileña que leva anos firmando os carteis do Samaín de Cedeira e tamén participando nas activides e no obradoiro no que, habitualmente, colabora na realización dun gran mural en papel.