Skip to content Skip to left sidebar Skip to footer

MEDIO AMBIENTE

“CEDEIRA MARIÑEIRA” ARRANCA O TRABALLO DE CAMPO PARA O DESEÑO DE NOVAS RUTAS QUE RECOLLAN O SABER MARIÑEIRO E VALORICEN O PATRIMONIO LITORAL

O Concello de Cedeira foi beneficiario da convocatoria do GALP da Consellería do Mar, na que se financiou ao 100% o proxecto “DEFINICIÓN, DESEÑO E IMPLEMENTACIÓN DE RUTAS TEMATIZADAS PARA A PROMOCIÓN DO PATRIMONIO MARIÑEIRO DO CONCELLO DE CEDEIRA –CEDEIRA MARIÑEIRA”.

CEDEIRA MARIÑEIRA persegue promover a oferta de experiencias e actividades que poñan en valor o medio ambiente e o patrimonio ligado ao mar (patrimonio material, arquitectónico, natural e patrimonio inmaterial), recoñecendo ao mesmo tempo os oficios do mar e a calidade diferencial dos produtos pesqueiros e marisqueiros desta zona.

O proxecto identificará unha serie de rutas tematizadas co propósito de concienciar sobre a necesidade da preservación da contorna natural e patrimonial, así como o recoñecemento dos oficios do mar (armadores, redeiras, mariscadoras, percebeiros, comercializadoras etc.), ademais dos produtos da lonxa e a súas características de frescura, sabor e identidade. Para elo arranca esta fase de traballo de campo en forma de xuntanzas cos membros da corporación técnica do concello e os informadores turísticos da OIT de Cedeira.

Por outra banda o “Club Candieira”, unha entidade local moi proactiva na execución de rutas de valorización do patrimonio nesta zona, colaborará co seu saber sobre o estado actual do territorio en canto a rutas que xa existen e outras que poderían ser de grande interese e de momento non están postas en valor.

A veciñanza e os grupos sectoriais da pesca da vila serán parte fundamental para a recompilación de datos para procesar e dar sentido e contido ao obxectivo deste proxecto: concienciar sobre a necesidade da preservación da contorna natural e patrimonial, así como o recoñecemento dos oficios do mar (armadores, redeiras, mariscadoras, percebeiros, comercializadoras etc.) e a calidade diferencial dos produtos pesqueiros e marisqueiros do territorio.

Estes meses de verán, coa identificación das rutas tematizadas para sendeirismo e BTT, e a elaboración de contidos, gravacións en audio e videotestemuñas, deseñarase material divulgativo cun total de 3.000 folletos, co ánimo de que chegue a información do proxecto a diversos públicos non tan asiduos ás ferramentas tecnolóxicas.

O material divulgativo distribuirase entre equipamentos municipais clave e establecementos da hostalería e restauración –moi implicados na vila de Cedeira con outros proxectos GALP como Cedeixura (Pesca de Costa), PescaturAcción e Emprende Pesca-.

O ALUMNADO DE INFANTIL DO CEIP NICOLÁS DO RÍO PRANTOU UNHA LARANXEIRA NO XARDÍN DO PAZO DE MOSCOSO

Nenos e nenas de Infantil do CEIP Nicolás do Río participaron esta semana na prantación dunha laranxeira no novo espazo verde de acceso público situado na traseira do Pazo de Moscoso, cuxas obras de rehabilitación están na súa recta final. Desde o Concello de Cedeira, o alcalde Pablo Diego Moreda Gil recordou que na zona había antigamente máis destas árbores e que, de feito, diante do Concello pervive unha con máis de cen anos que dá nome á Praza da Laranxeira. “Quixemos manter a tradición das laranxeiras e que os máis pequenos teñan a experiencia da prantación e poidan gardar o recordo, xa que verán medrar a árbore e crecerán con ela”.

A rehabilitación do Pazo de Moscoso é o investimento máis ambicioso do actual mandato. Foi adxudicada a finais de 2020 por un importe de máis de 450.000€ para albergar diferentes servizos municipais, entre os que están os Servizos Sociais e Intervención, así como as oficinas da Policía Local. As obras están practicamente listas e o Concello está xa comprando o mobiliario e equipamento necesario, para poder abrir as novas dependencias en canto sexa posible.

O proxecto incluía tamén facer do terreo anexo ao inmoble un parque de uso público e a laranxeira prantada polo alumnado do colexio ocupa xa un lugar central no mesmo. Segundo informou o alcalde, o goberno local está a tratar cos propietarios dos edificios colindantes ao xardín para ver de poder facer un gran mural na parede medianera que pecha este espazo. A intención do Concello tamén é recuperar unha parte da antiga muralla cuxos restos están noutro lateral deste novo espazo público.

A intervención, ademais de ampliar os espazos de atención á cidadanía de Cedeira, significa a recuperación dun edificio noble da localidade. É un edificio do século XV que estaba no abandono e que agora volve ser unha mostra da importancia e a grandeza que ten o conxunto das rúas do casco vello.

17 TERRITORIOS ASPIRAN ESTE ANO A SE CONVERTER EN XEOPARQUE MUNDIAL DA UNESCO

A Secretaría da UNESCO publicou recentemente o listado de candidatos a obter este ano o distintivo de xeoparque mundial. Por parte de España están propostas a zona de Costa Quebrada, en Cantabria, e a do Cabo Ortegal, compartindo opcións ao recoñecemento con outros 15 territorios situados no Brasil, China, Grecia, Indonesia, Irán, Irlanda, Italia, Kirguizistán, México, Noruega, Corea do Sur e Rusia. Durante os próximos meses, en datas aínda por determinar, persoas expertas pertencentes ao equipo designado pola UNESCO visitarán cada un dos proxectos para facer unha avaliación exhaustiva do seu patrimonio xeolóxico, pero tamén do seu compromiso e do traballo que se está facendo en relación co desenvolvemento sostible. Mentres tanto, o Proxecto de Xeoparque de Cabo Ortegal segue traballando en rede con outros territorios con intereses comúns e, nese sentido, participará a semana que vén nun encontro en Santander no que se tentarán sentar as bases para creación dunha Ruta Transcantábrica da Xeodiversidade que implique os xeoparques do norte do Estado.
Os estados membros das Nacións Unidas teñen até o 7 de xullo para formular alegacións á relación de candidaturas 2021-2022, data a partir da cal se producirá a visita das inspectoras ou inspectores internacionais.
Ademais, a UNESCO ten tamén en marcha a elección do equipo de avaliadoras e avaliadores que visitarán os 17 territorios aspirantes, tras manter aberto até o pasado 15 de abril o prazo de recepción de solicitudes para entrar na lista de persoas expertas.
Con esta información, e ante o elevado número de candidaturas que hai este ano, prevese que as misións de avaliación nos distintos países se leven a cabo a partir de mediados ou incluso finais do verán, tendo en conta que a loxística debe coordinarse coa Secretaría e cos propios avaliadores, como moi tarde, ata un mes antes da súa viaxe.
A UNESCO enviará dúas persoas que permanecerán no territorio cinco días -incluído o da chegada- facendo visitas de campo para ver os recursos xeolóxicos máis destacados, analizando o grao de cumprimento das condicións para ser xeoparque e mantendo encontros tanto cos responsables do proxecto como co tecido social.
Todo está pautado nun rigoroso protocolo que inclúe unha xuntanza final na que os dous avaliadores internacionais, que non poden ser españois, exporán as súas observacións e formularán as recomendacións que estimen oportunas. O protocolo insiste na obriga de que durante a súa estadía ambos garden discreción sobre o sentido do informe de xulgamento que deberán elaborar para o Consello Executivo e o Consello de Xeoparques Mundiais da UNESCO, os organismos que teñen a última palabra na asignación do ansiado distintivo.
Relación con outros territorios
No listado de tarefas dos avaliadores tamén se encontra a análise do proxecto “non só nunha escala nacional, senón tamén para ter un retrato global, especialmente unha perspectiva sobre o traballo en rede”, apunta a documentación da UNESCO. Neste sentido, o Proxecto de Xeoparque do Cabo Ortegal leva varios anos participando en encontros técnicos e intercambiando información con outros territorios que xa forman parte da rede mundial.
A próxima cita deste tipo está programada para dentro duns días nas xornadas sobre Patrimonio xeolóxico, xeoparques, investigación científica e aproveitamento turístico que se desenvolverán o 6 e 7 de xuño en Santander, cadrando coa celebración do Día Internacional da Xeodiversidade e baixo a organización da Real Academia de ciencias Exactas, Físicas e Naturais.
No marco deste foro, as zonas da cornixa cantábrica debaterán sobre a conveniencia de establecer unha Ruta Transcantábrica da Xeodiversidade que conecte os diversos espazos de interese xeolóxico do norte peninsular, onde neste momento se encontran o Xeoparque da Costa Vasca, o burgalés de Las Loras e o Xeoparque Montañas do Courel. Costa Quebrada -anfitrioa das xornadas- e Cabo Ortegal poderían ser os seguintes, o que elevaría a 17 o número de territorios españois co recoñecemento da UNESCO.