MEDIO AMBIENTE

O LITORAL E A SERRA DA CAPELADA, PROTAGONISTAS DAS CINCO XEORRUTAS DESTA SEMANA POLO PROXECTO DO CABO ORTEGAL

Iniciado xullo, os concellos integrados no proxecto de xeoparque intensifican a programación de xeorrutas con seis saídas que se desenvolverán este mércores e máis o sábado e o domingo. A primeira é a das Praias das areas negras que baixa até Teixidelo, en Cedeira, para sorprenderse coa extraordinaria aparencia do areal, único no mundo, e cos fenómenos xeolóxicos que o orixinaron. Porén, o groso do programa concentrarase na fin de semana. O sábado de mañá achegarémonos aos cantís de Cariño na Xeorruta do Limo e pola tarde subiremos na Xeorruta do Cromo desde preto de Santo André até o miradoiro de Garita de Herbeira. A ruta matutina do domingo -a Xeorruta dos Penidos- levaranos en Ortigueira ao lugar de interese xeolóxico de relevancia internacional (Geosite) situado na marxe sur da Serra da Capelada, previo paso polo Pozo do Inferno e a Fervenza do Casón. A oferta de percorridos complétase de novo en Cedeira cun itinerario de baixa intensidade -a Xeorruta do Litoral- relativamente preto da vila.

Mércores 6 de xullo, 10:00h a 14:00h: Xeorruta da Praia das Areas Negras (Concello de Cedeira). 15 prazas. Esta ruta xeolóxica permite coñecer a que está considerada como a única praia de area negra non volcánica do noso planeta. Pero, sen dúbida, o emprazamento do areal de Teixidelo -aos pés dos cantís máis altos da Europa continental- fan da zona un lugar de paisaxes incribles e cheo de contrastes.

Ao longo da ruta tamén poderán ollarse a fervenza ou a falla que leva o mesmo nome, unha estrutura xeolóxica que discorre por un fermoso val que presenta todas as características dunha orixe glaciar.

Trátase dun percorrido de dificultade alta que require bo estado de forma e roupa e calzado adecuados. Tamén é altamente recomendable levar vara ou bastón, protección solar, auga e algo de comer (froita, barras enerxéticas, mellor algo lixeiro). Máis info e reservas aquí.

Sábado 9 de xullo, 10:00 a 14:00h: Xeorruta do Limo (Concello de Cariño). 20 prazas. Esta ruta polo macizo do Limo permitirá descubrir formacións rochosas moi singulares, que co paso do tempo adquiren formas sumamente curiosas e rechamantes.

Isto, unido a que o percorrido discorre polos cantís máis verticais da Serra da Capelada, farán desta visita xeolóxica unha oportunidade única para coñecer a zona lindeira co corte costeiro de Herbeira, máis elevado pero menos pendente. Máis info e reservas aquí.

Sábado 9 de xullo, 16:30 a 20:30h: Xeorruta do Cromo (Concello de Cedeira). 20 plazas. Partindo do Cruceiro de Teixidelo -preto de onde se encontra o monumento a Leslie Howard- iremos bordeando a costa até Herbeira. Unha zona espectacular polas vistas, pero tamén por ser paraíso das rochas ultramáficas e de materiais como a cromita, a magnetita, a morenosita, a zaratita ou a andradita.

No percorrido pararemos en puntos onde, ademais de minerais ricos en cromo, tamén se atoparon acumulacións de platino. A visita tamén permite apreciar unha falla que fende toda a Serra da Capelada. Máis info e reservas aquí.

Domingo 10 de xullo, 10:00 a 14:00h: Xeorruta dos Penidos (Concello de Ortigueira) As ecloxitas son un tipo de rochas orixinadas a máis de 100 quilómetros de profundidade que aquí, na no Complexo Xeolóxico do Cabo Ortegal, poden verse en superficie. A zona norte da Capelada leva décadas sendo obxecto de investigacións por este motivo.

Porén, na banda sur, na zona de Couce do Penido -relativamente preto do límite con Cerdido e Cedeira-, tamén se observan numerosos exemplos destes materiais, razón pola que o IGME a catalogou recentemente como Geosite, ou o que é o mesmo, como lugar de interese xeolóxico cunha relevancia internacional.

A visita non chegará tan abaixo no mapa, senón que discorrerá máis ao norte, preto do rego do Casón, que nos ofrece o espectáculo xeolóxico da fervenza e do Pozo do Inferno, xunto cos vestixos do castelo que dominaba desde o alto a ribeira oeste da ría de Ortigueira. Máis info e reservas aquí.

Domingo 10 de xullo, 16:30 a 19:30h.: Xeorruta do Litoral (Concello de Cedeira). A oferta de xeorrutas desta semana remata en Cedeira o domingo pola tarde ofrecéndonos un itinerario de tres horas e moi doado de facer.

Trátase dunha andaina de 8 quilómetros que se fai sen moito esforzo nunhas tres horas (cómpre ter costume de camiñar). Sáese da oficina de turismo, visítase a praia da Magdalena e prosegue pola contorna do porto de Cedeira e parte da marxe leste da boca da ría. Nese camiño veremos a deformación das rochas e a xeomorfoloxía mariña e fluvial, pero tamén haberá tempo para visitar o xacemento arqueolóxico de Punta Sarridal. Máis info e reservas aquí.

Recordamos que as reservas nas xeorrutas só poden facerse en liña a través do apartado Xeorrutas desta mesma web, onde se describen con algo máis de detalle os 16 percorridos guiados polo Doutor en Xeoloxía Francisco Canosa.

No apartado tamén se recollen as datas e horarios das case 70 saídas que aínda nos quedan por facer até o próximo 14 de setembro. Cómpre reservar con tempo, xa que boa parte dos itinerarios adoitan esgotar as prazas nos días previos.

Xeorrutas marítimas

A semana que vén -central das vacacións de xullo- haberá xeorrutas desde o martes ata o domingo e, ademais, tamén comezan as rutas marítimas entre o peirao vello de Cedeira e os Aguillóns ofrecidas pola empresa de turismo activo Rutas Cedeira. Se o tempo o permite sairán o xoves 14 ás 17:00h e o domingo 17 ás 17:30h. En xullo tamén teñen previstos paseos os venres 22 e 29 e o domingo 31.

As viaxes -nas que tamén vai a bordo o xeólogo Fran Canosa- duran arredor de 2,5 horas e teñen un prezo de 50€ por persoa. Para reservar débese contactar directamente coa empresa no 722 615 382

COMEZA A TEMPORADA ESTIVAL DE XEORRUTAS CON CATRO PERCORRIDOS DE VENRES A DOMINGO

En nada arranca o mes de xullo e con el un novo calendario de rutas xeolóxicas polo ámbito do proxecto de xeoparque, que nos permitirán ver de preto distintos episodios da formación do noso planeta. Desde este venres ata o domingo hai planificados catro percorridos nos que desde hai uns días poden facerse reservas. Son a Xeorruta da Praia das Areas Negras o venres pola mañá, a Xeorruta dos Cantís o sábado á tarde, a Xeorruta dos Cabos (novidade este verán) o domingo pola mañá e, pechando a fin de semana, a Xeorruta do Toelo, que se desenvolverá o domingo pola tarde. De momento hai prazas dispoñibles en todas elas e cómpre ter en conta que na aplicación de reservas é necesario seleccionar o mes de xullo para ver as datas e poder rexistrar e confirmar a petición. O prezo de cada itinerario -incluído seguro- son 9€, con posibilidade de cancelar e recuperar o importe ata 24 horas antes de cada ruta.

Venres 1 de xullo, 10:00h a 14:00h: Xeorruta da Praia das Areas Negras (Concello de Cedeira). 15 prazas. A temporada de verán estréase coa ruta habitualmente máis exitosa de todo o calendario, a pesar de ser tamén a máis dificultosa e a que require unha mellor forma física. O esforzo paga a pena, e moito, xa que o descenso a Teixidelo permite coñecer a que está considerada como a única praia de area negra non volcánica do noso planeta.

Ademais, o seu emprazamento –aos pés dos cantís máis altos da Europa continental- fan desta zona un lugar de paisaxes incribles e cheo de contrastes. Ao longo da ruta tamén poderán ollarse a fervenza ou a falla de Teixidelo, unha estrutura xeolóxica que discorre por un fermoso val de orixe glaciar. Máis info e reservas aquí.

Sábado 2 de xullo, 16:30 a 19:30h: Xeorruta dos Cantís (Concello de Cedeira). 20 prazas. O sábado á tarde temos un percorrido doado desde o miradoiro do Chao do Monte -preto de Santo André- para descubrirmos a Serra da Capelada, unha salientable estrutura xeolóxica de máis de 400 m de altitude. No camiño observaranse distintos tipos de rochas que hai millóns de anos se atopaban a 70 km de profundidade, algo que podemos ver en varios lugares do Complexo Xeolóxico do Cabo Ortegal, exemplo único do denominado contexto xeolóxico do Oróxeno Varisco Ibérico. Máis info e reservas aquí.

Domingo 3 de xullo, 10:00 a 13:00h: Xeorruta dos Cabos (Concello de Valdoviño). 20 prazas. Esta é, xunto coa do Arsénico, unha das rutas novas do programa de verán do proxecto de xeoparque. Saíndo do miradoiro do Paraño farase un percorrido de baixa dificultade polo litoral no que veremos, entre outros fenómenos, o remate da Falla de Valdoviño que se estende ata Monforte de Lemos, ou rochas que hai millóns de anos formaban parte do leito dun antigo océano e que habitualmente non aparecen na superficie da Terra.

No paseo guiado polo xeólogo Francisco Canosa tamén descubriremos os restos dun vulcanismo explosivo testemuñado nos penedos da praia de Pantín. Canosa tamén explicará como se formou a lagoa e o sistema dunar da Frouxeira, un dos máis importantes do noroeste peninsular. Máis info e reservas aquí.

Domingo 3 de xullo, 16:30 a 20:30h: Xeorruta do Toelo (Concello de Moeche). 20 prazas. Facendo este percorrido poderá coñecerse de primeira man un dos materiais ornamentais máis exclusivos que temos en Galicia, a serpentina ou toelo. Estas rocha, cunha fermosa cor verde -de aí o nome de serpentina-, foi obxecto de explotación dende o século XIX en canteiras do concello de Moeche e San Sadurniño. Algunhas destas explotacións e os produtos finais do seu traballo (cruceiros, linteis, hórreos, escaleiras, etc.) poderán visitarse e contemplarse nesta xeorruta, que inclúe a entrada no castelo medieval. Máis info e reservas aquí.

CARIÑO, CEDEIRA E VALDOVIÑO REÚNENSE PARA FOMENTAR O EMPRENDEMENTO NA TRANSFORMACIÓN E DIVERSIFICACIÓN DO SECTOR PESQUEIRO

O “PROGRAMA DE VALORIZACIÓN DA PESCA SUSTENTABLE, E PARA IMPULSO DO EMPRENDEMENTO, PRIORITARIAMENTE NA TRANSFORMACIÓN, NO SECTOR PESQUEIRO NOS CONCELLOS DE CARIÑO, CEDEIRA E VALDOVIÑO. EMPRENDEPESCA” (2021-2022) é unha iniciativa conxunta entre os Concellos de Cariño, Cedeira e Valdoviño, financiada co Fondo Europeo e Marítimo da Pesca (FEMP), aprobado na primeira fase de axudas dos Grupos de Acción Local Participativo, de 2021.

EMPRENDEPESCA é un proxecto que ten como prioridade dar a coñecer as diferentes posibilidades que ofrece o sector do mar no territorio Emprendepesca, e dar visibilidade a aquelas oportunidades emprendedoras que o diversifican facéndoo máis competitivo e innovador.

Esta iniciativa, que vén liderada polo Concello de Cedeira, aposta polo xurdimento de novos negocios ou liñas de negocio relacionadas co sector pesqueiro e mariñeiro, como está a suceder noutros territorios da costa galega, e que a través da aparición de novas ideas innovadoras e diversificadoras, ven crecer social e economicamente os seus pobos.

Na reunión celebrada no Concello de Valdoviño, e na que participaron os representantes dos tres Concellos, falouse das diferentes actividades que nesta anualidade 2022 estanse a executar, como é a posta en marcha da páxina web emprendepesca.gal/.

A páxina web de EMPRENDEPESCA vén sendo un lugar de referencia para toda persoa que queira obter información do proxecto, facer unha consulta ou requirir axuda dos técnicosasesores que están a disposición das persoas interesadas nesta actuación. Ademais nela pódense consultar, entre outra información: os recursos que teñen a súa disposición as persoas emprendedoras, casos de emprendemento que son considerados boa práctica na transformación, ou nos sectores de hospedaxe, hostaleira, así como outras experiencias todas elas relacionadas co sector do mar.

EMPRENDEPESCA diríxese a persoas con interese, ilusión e gañas de emprender no sector pesqueiro e ver crecer a súa iniciativa dentro do seu pobo. Para todas estas persoas que se enrolen en EMPRENDEPESCA ofrecerase un asesoramento dirixido a posta en marcha da súa idea emprendedora, traballando o plan de empresa, o plan de viabilidade, a forma xurídica a elixir, os trámites legais e administrativos a cubrir, entre outras áreas.

Dentro do proxecto, tamén se detectan e se dan a coñecer oportunidades de negocio relacionadas co mar, sobre todo coa transformación do sector pesqueiro e a diversificación do mesmo e que teñen posibilidade de implantarse no territorio dos Concellos de Cedeira, Cariño e Valdoviño.

Emprendepesca conta coa colaboración de cinco entidades clave neste territorio, como son as Confrarías de Pescadores de Cedeira e de Cariño, a Asociación de Mariscadoras e Mariscadores de Cariño, as Asociacións de Percebeiros de Cariño e de Meirás.