MEDIO AMBIENTE

SEN PRAZAS EN DÚAS DAS CINCO XEORRUTAS QUE OFRECE ESTA SEMANA O PROXECTO DE XEOPARQUE DO CABO ORTEGAL

Ao longo desta última semana de xullo, os municipios promotores do proxecto de xeoparque teñen organizadas cinco saídas para descubrirmos as peculiariedades xeolóxicas do noso territorio. Neste sentido volveremos ter oportunidade de percorrer o litoral norte cos percorridos dos concellos de Cedeira e Cariño -as xeorrutas dos Cantís, do Litoral, dos Aguillóns e das Areas Negras- e tamén co preparado polo Concello de Valdoviño, a Xeorruta do Arsénico, novidade no programa deste verán. Tanto para este último, previsto para o xoves á tarde, como para o das Areas Negras, que baixará o domingo á praia de Teixidelo, xa non hai prazas dispoñibles. Ademais tamén está completa a xeorruta marítima que ofrece a empresa Rutas Cedeira na tarde do 31.

As reservas para as rutas con prazas dispoñibles hai que facelas obrigatoriamente en liña a través da aplicación habilitada este ano na nosa web, onde se pode gardar sitio en calquera itinerario a varias semanas vista e cun custe por persoa de 9€, reintegrables ata 24 horas antes no caso de cancelación.

O programa da semana inclúe, como principal novidade, o percorrido do Arsénico pola costa de Meirás, en Valdoviño, atendendo a cuestións como as fallas, o vulcanismo, a formación da lagoa ou o sistema dunar da Frouxeira. Porén, un dos aspectos que se verán con máis detemento son as acumulacións de arsenopirita na contorna da capela do Porto e outros puntos do litoral que foron explotadas na primeira metade do século XX. Da actividade mineira quedan vestixios en forma de galerías e socavóns que nos falan da penosa extracción dun material que tamén contiña metais coma o ouro ou a prata.

Esta ruta logo completou as 20 prazas ofertadas e, por este motivo, quen queira facela deberá anotarse na saída do 21 de agosto (10:00h) e sen demorarse moito, xa que no momento de redactar esta información só quedan cinco por cubrir.

Outra que está completa para este domingo é a Xeorruta da Praia das Areas Negras do domingo pola mañá, aínda que nese caso teremos máis oportunidades de facela, concretamente o xoves 4 de agosto, o domingo 14, o martes 23 e, xa en setembro, os días 4 e 10. As reservas para calquera deses días poden tramitarse desde esta ligazón.

As outras tres rutas xeolóxicas onde hai sitio son as seguintes:

Xoves 28 de xullo, 10:00 a 13:00h.: Xeorruta do Litoral (Concello de Cedeira). Trátase dunha andaina de 8 quilómetros que se fai sen moito esforzo nunhas tres horas (cómpre ter costume de camiñar). Sáese da oficina de turismo, visítase a praia da Magdalena e prosegue pola contorna do porto de Cedeira e parte da marxe leste da boca da ría. Nese camiño veremos a deformación das rochas e a xeomorfoloxía mariña e fluvial, pero tamén haberá tempo para visitar o xacemento arqueolóxico de Punta Sarridal. Máis info e reservas aquí.

Sábado 30 de xullo, 10:00 a 14:0h: Xeorruta dos Aguillóns (Concello de Cariño). Máximo 20 prazas. Coñecerase de primeira man a maior concentración de ecloxitas de todo o planeta. As ecloxitas son rochas formadas en condicións de altas presións e temperaturas na parte máis próxima a nós do Manto terrestre e que, por este motivo, son difíciles de ver en superficie. Toda a zona que se visitará o sábado foi obxecto de numerosas investigacións científicas nas últimas décadas -sobre todo a parte máis ao norte, onde xorden os Aguillóns- porque a súa análise permite extraer datos sobre o que ocorreu e ocorre no interior do planeta.

Será unha auténtica “viaxe ao interior da Terra” sen deixar de ver a luz do día na que tamén haberá tempo para descubrir as formacións xeolóxicas que aparecen en San Xiao do Trebo, orixinadas neste caso pola fusión de outros materiais.

O percorrido consta de 3 paradas e o desprazamento entre elas realizarase en coches particulares. O percorrido ten unha dificultade media, debido á presenza de tramos con certa pendente, polo que é preciso levar un calzado cómodo e axeitado para ese tipo de terreos. Máis info e reservas aquí.

Sábado 30 de xullo, 16:30 a 19:30h: Xeorruta dos Cantís (Concello de Cedeira). Máximo 20 prazas. O sábado á tarde temos un percorrido doado desde o miradoiro do Chao do Monte -preto de Santo André- para descubrirmos a Serra da Capelada, unha salientable estrutura xeolóxica de máis de 400 m de altitude. No camiño observaranse distintos tipos de rochas que hai millóns de anos se atopaban a 70 km de profundidade, algo que podemos ver en varios lugares do Complexo Xeolóxico do Cabo Ortegal, exemplo único do denominado contexto xeolóxico do Oróxeno Varisco Ibérico. Máis info e reservas aquí.

Fotos das antigas galerías das minas de arsénico de meirás (César Galdo)

“DESCOBRE CEDEIRA” PERMITE AOS VISITANTES COÑECER MÁIS A CONTORNA DA VILA A TRAVÉS DE CATRO ROTEIROS

A través do programa “Descobre Cedeira”, o Concello da vila ofrece un ano máis aos visitantes a posibilidade de coñecer polo miúdo algúns dos emprazamentos máis destacados da súa contorna. Para este período estival (ata mediados de setembro) programáronse dezaoito excursións repartidas en catro roteiros, un máis que en edicións precedentes. Así, ás xa clásicas visitas ao casco urbano, a península de Robaleira ou Santo André de Teixido, se engaden agora saídas tamén pola serra da Capelada, en todos os casos coa dirección dunha guía titulada.

O programa arrincou esta mesma semana cunha excursión pola localidade que se repetirá os días 28 deste mes, o 10 e 30 de agosto e o 12 de setembro. O roteiro, que parte da oficina de turismo, ten unha duración de tres horas (10.00 a 13.00 horas) e unha dificultade baixa. Durante a mesma, os visitantes saberán máis da historia da vila e das súas tradicións visitando o casco antigo, o Castelo da Concepción ou o Castro Sarridal.

Hoxe mesmo arrincaron tamén os roteiros da Pedra Chantada, unha das grandes novidades da oferta para este 2022, pois permitirán aos visitantes descubrir a excepcional riqueza natural e paisaxística da Capelada, con visita a varios dos seus miradoiros máis destacados e ao curro. A proposta repetirase o 26 deste mes, o 8 de agosto e o 1 de setembro. Neste caso, as expedicións partirán da Estación de Servicio A Trabe e prolongaranse durante tres horas (10.00 a 13 horas).

O Roteiro dos Tesouros é outra das suxestións clásicas desde programa para gozar tamén das excelencias naturais da vila. Desde a praia da Madalena, os participantes accederán á península da Robaleira, ao faro e a cala de Cerdeiras, gozando dunhas magníficas vistas da ría e do porto cedeirés. Pódense reservar prazas para as excursións que se celebrarán o 18 deste mes, o 2 e 23 de agosto e o 6 e o 18 de setembro. Como nas anteriores, a dificultade é baixa e a duración do percorrido será de tres horas (10.00 a 13.00 horas)

Un pouco máis esixente en canto a dificultade (media) e duración (cinco horas) é o Roteiro de Santo André de Teixido, que parte ás dez da mañá da igrexa de Régoa e para o que se recomenda levar xantar, pois a chegada está prevista en torno ás cinco da tarde. As datas fixadas para esta excursión son o 20 deste mes, o 4 e o 25 de agosto e o 8 setembro.

Todas estas actividades son gratuítas, porén, posto que as prazas son limitadas, as persoas interesadas deben tramitar a súa inscrición previa de forma presencial na Oficina de Turismo de Cedeira, a través do teléfono 981 48 21 87 ou no correo electrónico mar.lopez@cedeira.gal. Recoméndase acudir a todas elas con calzado axeitado, bastón, auga, froita e chuvasqueiro.

O interese que espertaron as primeiras visitas permite augurar que o programa “Descobre Cedeira” mellorará os números da pasada edición en canto a afluencia. Entón foron case duascentas persoas as que participaron nas excursións propostas. Unha cifra que podería superarse tendo en conta que, como apunta Mar López, técnica de Turismo, neste 2022 na vila pálpase desde xuño a presencia dun maior número de visitantes, xa non só nacionais, senón tamén estranxeiros, coma antes da pandemia.

A todos eles están dirixidas estas excursións, pero tamén aos propios veciños de Cedeira que estean interesados en coñecer máis polo miúdo e ver con outros ollos moitos dos emprazamentos polos que pasan decotío.

COMEZA UNHA NOVA CAMPAÑA DE ESCAVACIÓN NO XACEMENTO ARQUEOLÓXICO DE CASTRO SARRIDAL

O luns arrincou unha nova campaña de escavación no Castro Sarridal, acometida polo equipo de Axa Arqueología baixo a dirección de Emilio Ramil. A intervención, a primeira que se realiza neste xacemento castrexo durante o 2022, está financiada polo Concello de Cedeira –cun presuposto de 18.000 euros-, que ratifica así o seu compromiso co “mantemento, conservación e posta en valor deste ben de gran riqueza patrimonial”, tal e como apunta o alcalde da vila, Pablo Diego Moreda. As accións sobre o terreo prolongaranse durante todo o mes de xullo e neste tempo daráselle continuidade aos traballos iniciados na campaña anterior, no que a escavación do paramento exterior da muralla e o antigo foso se refire.

Segundo explicou Emilio Ramil, as actuacións están encamiñadas a que estas dúas estruturas, que conformaban unha liña defensiva que separaba o exterior da zona doméstica, queden á vista tal e como estaban orixinalmente. Ademais de afondar na investigación xa iniciada, esta nova actividade arqueolóxica permitirá, a nivel patrimonial, contextualizar estas construcións no conxunto do castro.

A intervención abarcará unha superficie de 120 metros cadrados e removerá un volume de terra considerable, aínda que resulta imposible determinar con precisión canto será, posto que a cantidade dependerá da profundidade real que acabe tendo o foso, disposto en forma de “V”. Na campaña que comezou o luns, Emilio Ramil estará acompañado por un equipo formado por outro arqueólogo, catro auxiliares de arqueoloxía e un técnico de dron encargado de documentar os traballos a través de imaxes cenitais.

Estas primeiras xornadas estiveron dedicadas a tarefas de acondicionamento pois, aínda que a empresa Axa Arqueología realiza traballos periódicos de mantemento e limpeza, nesta época do ano a vexetación crece moi rápido. Ademais, a zona é o hábitat natural dun rabaño de cabras que acostuman deixar restos biolóxicos que houbo tamén que retirar.

Esta intervención é a sétima que se desenvolve no xacemento castrexo do Sarrida, que comezou a escavarse durante o anterior mandato, sendo entón concelleira de Cultura e Turismo María José Rodríguez, unha figura que continúa estreitamente vencellada e comprometida con todos os traballos que se están a desenvolver no castro e que neste tempo permitiron deixar ao descuberto, entre outros fitos, un dous cinco monumentos con forno de Galiza ou a pedra formosa máis antiga da nosa comunidade, datada aproximadamente no 230 a.C.

Segundo os resultados obtidos este mes, a campaña esixirá no futuro de novas actuacións para consolidar os elementos descubertos, e que pasarían pola súa limpeza e a colocación de dúas ou tres filas novas de pedras que eviten que as orixinais acaben danadas. Precisamente, o alcalde de Cedeira, Pablo Diego Moreda, e a propia María José Rodríguez, están pendentes de reunírense coa Directora Xeral de Patrimonio da Xunta, María del Carmen Martínez Insua, para solicitar que sexa este organismo, como en anos anteriores, o que sufrague esa intervención. Patrimonio da Xunta de Galicia está a ser neste últimos anos un activo axente na financiación das actuacións no xacemento castrexo do Sarridal.