Skip to content Skip to left sidebar Skip to footer

DEPORTES

O CONCELLO PROXECTA A SUBSTITUCIÓN DAS CALDEIRAS DE GAS POR OUTRAS DE BIOMASA NA PISCINA MUNICIPAL

O goberno local de Cedeira vén de presentar un proxecto de substitución da actual caldeira de gas da piscina municipal por un sistema de biomasa, máis eficiente e menos contaminante, ao Fondo de Cooperación Local. Segundo informou o alcalde, Pablo Diego Moreda Gil, a actuación está orzamentada en algo máis de 92.000€ e solicitouse o 100% de axuda para financialo totalmente a través da devandita convocatoria da Xunta de Galicia.

O alcalde de Cedeira destacou que o cambio de sistema vai aforrar ao ano a emisión de 61,39 toneladas de CO2 á atmósfera. Actualmente, a piscina municipal conta con dúas caldeiras de gas, un combustible fósil que é máis contaminante, e unha microxeración de gas que non está en uso. A actuación proposta pasa por modernizar as instalacións, consonte o que di o Código Técnico da Edificación e o Regulamento da Instalacións Térmicas en Edificios, para empregar enerxías renovables. Así, as novas caldeiras funcionarán con pellets e permitirán quentar o vaso de auga da piscina, proporcionar calefacción ao edificio e producir auga quente.

Instalaranse dúas caldeiras de biomasa, de 64 kW de potencia cada unha, que se alimentarán de forma automática desde un silo textil ubicado na parte superior da actual sala das caldeiras de gas. Mellorarase o illamento das tubaxes, para evitar perdas de enerxía, e levarase a cabo unha mellora na regulación do sistema, que estará mellor controlado e por tanto será máis eficiente.

O Concello de Cedeira está a reclamar a construción dunha nova piscina de 25 metros, porén cando ese proxecto se faga realidade –clarexan desde o goberno local- a actual seguirá a prestar servizo á poboación.

Moreda Gil recordou que o Concello de Cedeira está comprometido coa loita contra o cambio climático. No ano 2020 o alcalde asinou o Pacto das Alcaldías polo Clima e a Enerxía, ao que se sumaron máis de 7.000 concellos de 57 países, e a continuación elaborouse un plan de acción que preveía reducir as emisións contaminantes de Cedeira nun 40%. Xunto coas accións de sensibilización para que a poboación contribúa a limitar a contaminación, a administración local adquiriu un compromiso importante no recorte das emisións das súas propias instalacións.

O NATACIÓN CEDEIRA ESTRÉASE NUN CAMPIONATO INTERNACIONAL COA PARTICIPACIÓN DE CINCO DEPORTISTAS

O Club Natación Cedeira está a protagonizar un arranque de ano extraordinario, cos seus deportistas despuntando en natación, atletismo e triatlón. Desde o Concello quérese felicitar á entidade polos éxitos acadados e salientar que en poucos días a entidade vai a participar por primeira vez nunha competición internacional, na Copa de Europa de triatlón junior que se vai disputar o vindeiro domingo en Melilla.

O director do club, Xan Suárez Vilela, destaca non so que Cedeira vaia estar por primeira vez nun campionato internacional, senón que chega alí con cinco deportistas. Damián Suárez, Samuel Sánchez, Lucas Riola, Juan Piñón e Irea Alén van participar na competición europea, un fito que Xan Suárez considera importante non tanto polos resultados que poidan acadar senón como experiencia e para abrirse portas cara a competicións de maior nivel.

Un repaso aos éxitos deste comezo de ano corrobora o paso firme co que o Club Natación Cedeira está a avanzar competindo con tres federacións e competicións diferentes. Falando de natación, Andrea Freire foi subcampioa e Irene García levou o bronce no recente campionato galego na categoría alevín.

Na mesma cita Teo Sanesteban conseguiu tres ouros e unha prata, convertíndose no mellor deportista da cita. Cómpre destacar o potencial deste nadador, que entrou no chamado Grupo Especial de Seguimento da Federación Galega, no que é chamado de tempo en tempo para facer adestramentos e concentracións.

Tamén no eido do atletismo logrou éxitos destacables o Natación Cedeira. Irea Alén foi a subcampioa galega no campeonato galego de campo a través sub18 e, máis recentemente, Irene García e Manuel Sande foron tamén subcampioes na competición alevín. No triatlón, a participación de cinco deportistas de Cedeira no próximo europeo xuvenil é resultado do seu éxito no campionato de España que se celebrou en outubro pasado. Xa en decembro, preto do remate de 2022, o club conseguiu a mellor clasificación por equipos no campionato Nada+Corre, un éxito máis que corrobora a boa canteira e o futuro que ten o Natación Cedeira. O pasado ano, ademais, foi o único club que levou catro outros e un bronce en campionatos de España de Triatlón e Acuatlón.

A entidade conta na actualidade con 120 deportistas federados a partir de catro anos. Adestran na piscina, no pavillón do IES Punta Candieira, no local que ten o club preto do campo de fútbol e tamén no exterior, moitas veces polos viais pouco transitados do polígono de A Trabe. Xan Suárez subliña a importancia que ten conseguir a piscina de 25 metros, unha demanda que o goberno local presentou ao pleno da corporación para reforzala coa unanimidade das forzas políticas. Precisamente a intensa actividade do Club Natación Cedeira e os seus éxitos é un dos argumentos do goberno local para reclamar á Xunta de Galicia e á Deputación da Coruña a súa implicación na financiación da nova piscina.

O CLUB DE REMO VIVE UN MOMENTO DOCE POLOS BOS RESULTADOS COLLEITADOS POLOS SEUS DEPORTISTAS

O Club de Remo Cedeira está a vivir un momento doce polos destacados éxitos que está a colleitar en competicións nacionais e internacionais e polo seu prometedor comezo de tempada, con deportistas que sen dúbida poderán destacar nos campionatos da vindeira primaveira e o verán. A entidade ten unha remeira, Raquel Rodríguez, estudando cunha beca nunha universidade de California e outra, Candela Martínez, que acaba de obter un título nacional de remoergómetro, posicionada para entrar na selección nacional de remo en pista. Son so dous nomes do excelente equipo deste club, un dos de maior traxectoria na vila e que máis ten contribuído, por tanto, a consolidar a fonda tradición deportiva de Cedeira.

O presidente do club, José María Hermida, enumera os éxitos máis recentes no que vai deste ano 2023: medalla de ouro no Campionato de España de longa distancia na categoría xuvenil feminina; ouros nas competicións nacionais de remoergómetro nas categorías veterá e infantil masculinas; bronce no nacional de remoergómetro alevín feminino; prata e bronce no campionato de España absoluto feminino; bronce nos nacionais xuvenís masculino e feminino; e medallas de ouro e de prata por autonomías no campionato de España absoluto masculino. Súmanse estes logros aos do ano anterior, no que as remeiras do clube tamén colleitaron bos resultados en campinatos do Mundo e de Europa. Ocupan por tanto os remeiros e remeiras de Cedeira unha prometedora posición cara ás competicións a nivel nacional e internacional que se convocarán no que resta deste ano.

A historia da entidade remóntase a 1960. Naceu da man da Confraría de Pescadores de Cedeira e xa desde os seus primeiros anos combinou o banco móvil e o fixo. Hermida recorda que nos anos 70 a vida do club cobrou novos folgos co impulso de Juan Antonio Rodríguez. Daquela despuntou a remeira María Brocos, que abriu camiño á entidade nas competicións internacionais e á presencia de Cedeira na selección nacional. Foi tamén importante na historia do clube o ano 2016, cando o club se estreou con traíña propia na liga galega, na que se mantivo de maneira ininterrompida ata a tempada 2022.

Desde o goberno local destacan o esforzo do club e os logros que ten acadado, ao tempo que subliñan a importancia de que manteña en Cedeira a tradición do remo, tan vencellada á cultura mariñeira da localidade.