Skip to content Skip to left sidebar Skip to footer

CULTURA

O CONCELLO DE CEDEIRA PRESENTOU A SÚA PRIMEIRA GUÍA DE COMUNICACIÓN NON SEXISTA

O Concello de Cedeira presentou esta semana a primeira Guía de Comunicación Non Sexista, unha acción enmarcada no Plan de Igualdade que a corporación aprobou a finais do pasado ano e que describía preto de medio cento de accións a prol dunha equidade de xénero real e efectiva. A concelleira Carmela Prieto explicou no acto, que se desenvolveu no Auditorio Municipal, que esta é unha ferramenta “dirixida a mellorar a comunicación tanto da propia administración como das entidades e de toda a veciñanza”, porque “non hai maneira de invisibilizar máis que a de non nomear a unha parte da sociedade que somos as mulleres”.

A Guía de Comunicación Non Sexista está editada coa forma dunha baralla, cun “tip” sobre linguaxe inclusiva en cada carta. Foi elaborada para aprender, de forma lúdica, pautas e suxestións para procurar o equilibrio na linguaxe.

O I Plan de Igualdade do Concello de Cedeira ten executado xa moitas das accións previstas, parte delas de formación do persoal da administración local e outras que, de xeito transversal, implican ao tecido asociativo, á mocidade e outros colectivos da localidade. Entre elas está a creación do Punto Lila na Biblioteca Municipal, un espazo que foi inaugurado o pasado 8M e que reúne lecturas relacionadas co feminismo.

Recentemente púxose en marcha un programa de formación para as persoas voluntarias que van colaborar na posta en marcha dun Punto Violenta, un posto de información e concienciación sobre a violencia sexual que se instalará en festas e eventos multitudinarios. Carmela Prieto aproveitou a presentación da Guía de Comunicación Non Sexista para agrader a participación das personas que acudiron a este curso.

O PLENO APROBOU POR UNANIMIDADE A PROPOSTA DE ORZAMENTOS PARTICIPATIVOS DO ALUMNADO DO IES

O pleno da corporación de Cedeira aprobou antonte por unanimidade, en sesión extraordinaria, a proposta de orzamentos participativos que presentou o alumnado de 3º do IES Punta Candieira, representado na sesión por Martín Gutiérrez Couto.

O rapaz, que acudiu á sesión plenaria xunto con outros once compañeiros e compañeiras, defendeu a iniciativa elixida no proceso, a mellora da iluminación e a pintura da cancha de xogo do Floreal, e tamén argumentou a demanda de que o Concello asuma cando menos en parte o segundo proxecto máis votado, o denominado “Por unha praia divertida”. O alcalde, Pablo Diego Moreda Gil, acolleu positivamente a proposta e asegurou que o goberno local estudiará a posibilidade de poñer en marcha tamén ditas actividades no areal durante este verán.

O proxecto de mellorar a iluminación e a pintura da cancha de xogo do Floreal recibiu 28 votos na asemblea que celebrou o alumnado dos catro grupo de ESO no instituto, mentres que o segundo más votado, o desenvolvemento de xogos, obradoiros, ioga e outras actividades na praia da Madalena, recibiu 26. O primeiro deles case chega a esgotar os 20.000€ dos orzamentos participativos, porén o representante dos estudantes, Martín Gutiérrez, argumentou que se trata dunha obra de mantemento e mellora das instalacións municipais e que parte dela, concretamente a da iluminación, ía igualmente ser asumida polo Concello.

O grupo de 12 rapaces e rapazas que foron designados para representar a todo o alumnado de 3º de ESO no Concello foi recibido polo alcalde e concelleiros momentos antes do comezo da sesión extraordinaria. A unanimidade da corporación corroborou o éxito do proceso, que ten lugar por segundo ano consecutivo en Cedeira e que, tal como comprometeu o pasado ano o goberno local, vai continuar para servir como escola e experiencia de democracia á xuventude da vila.

A XUNTA DE GOBERNO APROBA AS NOVAS CONVOCATORIAS DE AXUDAS PARA ENTIDADES SOCIOCULTURAIS E DEPORTIVAS

A Xunta de Goberno Local de Cedeira aprobou as bases reguladoras para facer as novas convocatorias de subvencións para entidades e asociacións socioculturais, por unha banda, e deportivas por outra. Como en anos anteriores establécense en cada unha delas os apartados de actividades e investimentos e están dotadas con 36.000 euros respectivamente. O alcalde, Pablo Diego Moreda Gil, resaltou unha vez máis a importancia que ten para Cedeira a dinámica de participación e convivencia que impulsan as asociacións, axentes activos da integración, a igualdade, a cultura… e intermediarios indispensables entre o goberno municipal e a cidadanía. Destacou tamén a importancia do deporte na localidade, non so polos éxitos e medallas que chegan das competicións, senón porque é unha escola de hábitos saudables e dun ocio san para a infancia e a mocidade.

Un extracto de cada unha das convocatorias sairá publicada proximamente no BOP, momento no que se abrirá un prazo de 15 días hábiles para a presentación de solicitudes. Ambas as dúas resolveranse polo procedemento de concorrencia competitiva, baremando os criterios establecidos. Tamén nos dous casos, o apartado de actividades está dotado con 30.000€ -cun máximo de 7.000€ de subvención por entidade- e o de investimentos con 6.000€.

No caso das asociación socioculturais, os gastos subvencionables no apartado de actividades son a compra de trofeos, material non inventariable e funxible, desprazamentos para participar en eventos, alugamento de locais e materiais, pago a persoal, facturas de mantemento como o teléfono, a luz, etc., seguros, cartelería e outros traballlos de divulgación das actividades. O apartado de investimentos, vai dirixido a subvencionar a compra de material inventariable relacionado coa actividade da asociación por importe igual ou superior a 100€.

Os criterios para a concesión destas subvencións son o fomento da participación feminina, o número de socios, a antigüidade, o feito de contar con local propio ou en aluguer, a realización de propostas para a zona rural, a menor cota mensual, o número de actividades, a contratación de persoal, a colaboración con outras entidades, os desprazamentos e o uso do galego.

No caso das bases para entidades e clubes deportivos, as axudas van para sufragar os gastos de compra de trofeos, material non inventariable, gastos de desprazamento e aloxamento para ir a competicións, aluguer de pistas deportivas, gastos federativos, de arbitraxes, nóminas do persoal técnico, carteis e outros materiais de difusión de eventos deportivos, seguros e outros gastos de mantemento como a luz, a auga, etc. serán para a compra de material inventariable, relacionado coa actividade deportiva do club, por importe igual ou superior a 100€.

O baremo neste caso avaliará o número de nenos e nenas que toman parte nas escolas de deporte base, a participación feminina, a organización de competicións, a antigüidade do club, o número de deportistas federados, o número de técnicos, o menor importe da cuota mensual e o uso da lingua galega, entre outras cousas. Este ano, por primeira vez, tamén puntúa o emprego da imaxe do Concello e do proxecto do Xeoparque Cabo Ortegal na vestimenta, indicando as bases que para o ano que vén será obrigatoria esta condición para aquelas entidades que renoven este equipamento.