BRAIS DAS HORTAS OFRECERÁ ESTE SÁBADO NO PARQUE DO FLOREAL O SEU “CONSERTASSO”

Brais das Hortas visitará este sábado Cedeira co seu espectáculo “Consertasso na horta”. O parque do Floreal acollerá ás 20.00 horas este concerto dirixido a todos os públicos, a cargo dun artista polifacético que de seguro vai facer agromar as gargalladas de toda a famillia.

O espectáculo é un percorrido musical por diferentes estilos desde o punto de vista do universo que é a horta. Por alí pasan unha pulga punk, caracois aos que lles gusta o reggae, kiwis que bailan ska… un ecosistema musical diverso e saudable para facerlle pasar un rato divertido a toda a familia.

Brais das Hortas é músico, narrador oral e clown. Ademais de producir os seus propios espectáculos, colabora habitualmente con diferentes grupos musicais e outros artistas. O público infantil é a súa especialidade.