Skip to content Skip to left sidebar Skip to footer

Author: Ana

Cedeira acolle mañá sábado o campionato galego de triatlon, que reunirá a 320 participantes

CEDEIRA ACOLLE MAÑÁ SÁBADO O CAMPIONATO GALEGO DE TRIATLON, QUE REUNIRÁ A 320 PARTICIPANTES

A vila de Cedeira acollerá por terceira ocasión o Campionato Galego de Triatlón, que será mañá sábado e no que participan un total de 320 nenos e nenas con idades comprendidas entre os dez e dezasete anos.

O Concello colabora economicamente na celebración do evento deportivo e pon a disposición da organización a cesión de instalacións e o traballo de axentes da Policía Local, membros de Protección Civil e traballadores municipais para garantir o normal desenvolvemento das probas, que darán comezo ás 13.05 horas e que terán lugar no contorno da praia da Madalena. Tamén contribúen con empanadas, mantecadas e outros agasallos a Panadaría Arribi e Gadis e Eroski con produtos para o avituallamento dos rapaces e rapazas.

A competición, que chega este ano a súa sexta edición local, dará lugar a probas de natación, bicicleta e carreira cuxos percorridos estarán en función da idade dos participantes. No caso da natación, a distancia será de 100 metros para os benxamíns e de 750 metros para os cadetes, mentres que na proba ciclista os máis novos pedalearán durante 2 quilómetros e os maiores un total de dez. As lonxitudes ás que se enfrontarán os participantes na proba da carreira oscilan entre os 500 metros e os 2,5 quilómetros.

A organización repartirá trofeos entre os tres primeiros clasificados, tanto a título individual como por equipos.

O goberno de Cedeira quere agradecer publicamente á organización a promoción deportiva que no ámbito local fai coa celebración dunha proba destas características, así como o traballo desinteresado dos voluntarios que veñen colaborando desde hai días para telo todo a punto cara ao día de mañá. Por outra banda, pídense desculpas aos veciños e visitantes polas incomodidades que poidan derivarse do desenvolvemento do campionato e tamén precaución por tratarse de competicións que requiren moito movemento de persoas e mesmo de vehículos.

O palacete acolle estes días unha mostra de labores realizadas pola asociación de patchword

O PALACETE ACOLLE ESTES DÍAS UNHA MOSTRA DE LABORES REALIZADAS POLA ASOCIACIÓN DE PATCHWORD

O Palacete municipal de Cedeira acolle estes días unha exposición de traballos realizados polas alumnas e socias da Asociación de Patchword da localidade. A mostra, que estará aberta ao público ata o día 15 do presente mes, pode ser visitada en horario de mañá e tarde, de 10.00 a 14.00 e de 17.00 a 21.00 horas.

A entidade, na actualidade presidida por Josefa López Rey, trata así de darlle visibilidade ás labores realizadas ao longo dos últimos meses, así como divulgar un traballo artesanal moi laborioso. Edredóns, roupa para nenos e nenas, neceseres e manteis son algúnhas das pezas expostas e realizadas por un conxunto de dezasete mulleres das máis de corenta socias que agora ten a Asociación de Patchword de Cedeira.

A obra que dotará de saneamento aos núcleos de Casal de María e Vila do Río xa está en fase e execución

A OBRA QUE DOTARÁ DE SANEAMENTO AOS NÚCLEOS DE CASAL DE MARÍA E VILA DO RÍO XA ESTÁ EN FASE E EXECUCIÓN

O Concello de Cedeira está a dotar de saneamento os núcleos de Casal de María e Vila do Río, os dous pertencentes á parroquia de San Román de Montoxo, cos traballos que darán comezo este mes e que estarán rematados no prazo de 28 días naturais.

O prezo de licitación superou os 98.500 euros e o proxecto finalmente foi contatado, por un importe de 76.830 euros, á empresa José No Mantiñán e Hijos Construcciones SA, ao resultar gañadora dun proceso de adxudicación no que tomaron parte un total de 13 construtoras.

As obras, no seu conxunto, discurrirán ao longo de un quilómetro e darán lugar á instalación dun total de 26 pozos prefabricados e á construción de zanjas con profundidade maior aos 1,75 metros. As canalizacións discorrerán por camiños de propiedade municipal e transportarán as augas residuais ata a estación depuradora situada na mesma parroquia, nas inmediacións do ría das Mestas.

O goberno municipal de Cedeira considera que é unha satisfacción poder anunciar o inicio dunha nova actuación que, neste caso, beneficiará de maneira máis directa aos veciños de Casal de María e de Vila do Río, pero que tamén repercutirá no conxunto da poboación cedeirense e mesmo dos seus visitantes, porque con ela estase a evitar a vertedura de augas residuais.