Author: Ana

O Concello de Cedeira quere promover as excursións de grupos escolares á Serra da Capelada, nun intento de que a xente nova coñeza de primeira man unha zona de alto valor paisaxístico e xeolóxico, núcleo do Xeoparque Cabo Ortegal que vén de ser recoñecido pola Unesco. O goberno local impulsa o programa da man das empresas de turismo activo Orixen e Portal Norte, que artellaron un programa de actividades que combina xogo, deporte e cultura co fío condutor da “Búsqueda do sanandresiño”.

Nenos e nenas poderán pasar unha xornada de actividades, adaptadas a cada grupo e idades, que se desenvolverá no parque de cordas do Campo de Armada e arredores. A cativada poderá gabear ás árbores e desplazarse entre elas coa axuda das cordas, estruturas de madeira e pontes colgantes que están instalados. No programa da xornada tamén ten cabida o sendeirismo e a orientación, xa que aprenderán a utilizar unha brúxula e terán que buscar con ela as balizas agochadas pola zona, cada unha delas asociada, no xogo, a elementos destacados da paisaxe e o territorio, como son o mar, a propia serra da Capelada, o santuario de Santo André de Teixido…

No programa da xornada ten cabida tamén un achegamento aos valores xeolóxicos da zona, coñecendo algunhas das rochas máis características do Xeoparque e gozando das vistas dos acantilados máis altos de Europa. A procura do “sanandresiño” guiará todo o xogo, co que tamén os participantes aprenderán sobre a cultura da zona e traballarán valores como a importancia dos hábitos saudables e do coidado da natureza.

Os colexios de calquera municipio que desexen organizar unha destas saídas poden poñerse en contacto co Concello de Cedeira para organizala enviando un mail a noel.lopez@cedeira.gal. A actividade un prezo bonificado pola administración local.

O Concello de Cedeira adxudicou á empresa Estudio Técnico Gallego a redacción do novo Plan Xeral de Ordenación Municipal (PXOM), por presentar a oferta máis vantaxosa entre as cinco que optaron ao proceso de licitación. O presuposto de contratación é de 181.469,75€ e o prazo de execución de catro anos, ainda que con seguridade a finalización do traballo demorarase máis porque o tempo deixará de correr cando o plan estea en tramitación nas diferentes administracións. A contratación realízase por un importe case un 30% por debaixo do prezo de licitación.

O alcalde, Pablo Diego Moreda Gil, subliña que a elaboración do PXOM é un proceso moi importante para o futuro de Cedeira e que precisa da participación e a implicación das forzas políticas, as entidades sociais e a cidadanía en xeral. Durante a elaboración do plan vanse convocar diferentes mesas de participación, unha delas específica de igualdade e outra de xuventude, para garantir o debate e a detección de necesidades.

“O reto é dotarnos dunha planificación que resposte ás aspiracións presentes e futuras de Cedeira, que permita desenvolver equipamentos como un novo colexio, aparcamentos ou máis zonas verdes, que facilite levar máis servizos á zona rural, que aporte seguridade ás persoas que teñen terreos para que saiban o que poden construír, que protexa o noso patrimonio… o plan xeral é o marco que nos damos a nós mesmos para que o urbanismo do noso municipio crezca de maneira ordenada”, explicou o alcalde. Moreda Gil subliñou que “o correcto desenvolvemento do PXOM contribuirá a mellorar servizos e fixar poboación en Cedeira, ao tempo que impulsamos o turismo coa filosofía de sostibilidade que defendemos no Xeoparque”.

O novo PXOM de Cedeira vai redactarse dacordo coa Lei do Solo Galega (LSG) e coa Lei de Ordenación Urbanística e Protección do Medio Rural de Galicia (LOUG). Actualmente, e segundo os datos publicados pola Xunta, so hai en Galicia 128 concellos cun plan adaptado á lexislación actual. O PXOM do Concello de Cedeira data do ano 1995 e elaborouse no seu momento dacordo coa lexislación de 1992. No ano 2008 a administración local de Cedeira puxera en marcha a redacción dun novo PXOM que non chegou a termo, de aí que desde o goberno municipal se inste a sumar esforzos e sacar adiante o plan, que xa requeriu un intenso traballo do persoal técnico do Concello na preparación do expediente de contratación.

Xunto coa redacción do novo PXOM de Cedeira a empresa adxudicataria realizará unha cartografía do territorio segundo o modelo de datos SIX. Como é preceptivo tamén neste tipo de traballos, o novo plan conleva un estudo ambiental estratéxico. O documento definirá os usos do territorio, desde o solo industrial ao edificable, as zonas verdes, para equipamentos, etc.

O pleno de Cedeira aprobou onte nunha mesma sesión, cos votos a favor do PSOE e o BNG, o orzamento municipal para o presente ano 2024 e unha modificación de créditos. O presuposto anual ascende a 6.433.888,27€, que representan un incremento do 0,49% respecto ao anterior de 2023, mentres que o expediente de modificación de créditos incorpora aos recursos económicos do Concello neste exercicio remanentes de Tesourería del año pasado por valor de 681.279,43€.

Os orzamentos de 2024 consignan 575.307,79€ a investimentos. Destacan neste apartado os proxectos que se van acometer coa financiación da Deputación Provincial, concretamente a rehabilitación do Palacete, a creación dunha zona verde de lecer na rúa Silva e a mellora de 15 camiños de titularidade municipal que suman máis de 6,7 quilómetros.

En canto aos investimentos, cómpre apuntar que a modificación de créditos aprobada na mesma sesión lles destina tamén un total de 225.913,89€, que servirán para levar adiante proxectos como a creación dunha zona axardinada e con aparcadoiro en Crónicas, a reparación de barandas da Ponte Vella e a praza da Reitoral, o arranxo do muíño da Corredoira e outras actuacións.

Un ano máis increméntase a contía destinada a subvencións, que ascende este ano a un total de 321.450€. Están incluídos os fondos municipais que, a través de convenios nominativos, o Concello de Cedeira destina a Protección Civil, a Cruz Vermella, a asociación Sobre Rodas, Apader, Abac, as asociacións de nais e pais Pica Peixe e O Beco, a asociación San Andrés de Teixido, A Crina, Arce e a Banda de Música Vila de Cedeira, así como a subvención para a escola de música Vila de Cedeira, que é de concorrencia competitiva. Tamén están nesta partida os 120.000€ que a administración local reserva para a convocatoria de axudas para financiar infraestruturas e actividades das entidades socioculturais e deportivas da localidade, e as aportacións para os grupos políticos municipais, a FEMP e a FEGAMP, a asociación Seitura, a entidade de xestión do Xeoparque Cabo Ortegal e a Mancomunidade.

De novo mantén o Concello de Cedeira o seu esforzo no eido dos servizos sociais. A partida destinada a estes programas increméntase preto dun 1% e chega ata 1.310.583,75€ que representan máis do 20% do orzamento municipal. Increméntase neste exercicio dunha maneira importante a contía dos fondos destinados ao fomento do emprego, que chega a 90.526,34€ (case un 90% máis que o ano pasado).

Os gastos de persoal do Concello de Cedeira ascenden este ano a 3.389.514,14%. A cifra actualizouse á alza nun 4,80% para dar cumprimento á suba das retribucións do persoal municipal segundo o acordo marco establecido entre Goberno e sindicatos e tamén para facer fronte a posibles acumulacións de tarefas e substitucións por baixas temporais, sobre todo do persoal de Servizos Sociais.