Skip to content Skip to left sidebar Skip to footer

Author: Ana

ADXUDICADA POR MÁIS DE 150.000€ A OBRA DE SUBSTITUCIÓN DO PAVIMENTO DO POLIDEPORTIVO MUNICIPAL DE CEDEIRA

A mesa de contratación do Concello de Cedeira adxudicou a obra de substitución do pavimento do Polideportivo Municipal por un presuposto de 151.247,77€ (IVE incluído), que supón unha rebaixa do 19,2% respecto ao prezo de licitación. O alcalde, Pablo Diego Moreda Gil, remarcou que se trata dunha intervención moi importante para poñer ao día a cancha de xogo dunhas instalacións que teñen un uso moi intenso. “O novo solo de madeira que se vai colocar está especialmente deseñado para absorber mellor os impactos dun uso deportivo, con todo o positivo que iso vai ser para os xogadores e xogadoras”, subliñou.

Oito empresas presentaron oferta ao proceso de licitación deste proxecto. A obra, como se recordará, será financiada nun 80% pola Deputación da Coruña e no 20% restante polo Concello, segundo o convenio de colaboración que asinaron o alcalde e o presidente provincial no pasado mes de xullo. O goberno local está moi satisfeito de que vaia a executarse este proxecto, no que comezou xa a traballar no ano 2018, cando encargou o primeiro informe técnico sobre a situación do pavimento do pavillón deportivo municipal.

A actuación abranque a substitución do solo de madeira da cancha de xogo –de 1.211,37 metros cadrados- e tamén do pavimento de linóleo das zonas anexas –165 metros cadrados-. Ademais, no proxecto vai incluída a substitución do marcador actual por un novo que se adaptará a todas as disciplinas deportivas que se desenvolven no polideportivo. Será un marcador dixital, de entre seis e dez metros cadrados, cun sistema de iluminación led que permitirá unha óptima visualización desde calquer punto da instalación. Virá cunha consola de control adaptada a todos os deportes, na que ao seleccionar cada disciplina xa se configurará a pantalla cos parámetros acaídos de tempo e puntuación, e tamén coa conexión á correspondente bucina.

Levantarase o chan actual de madeira, que está formado por tablas de laminado directamente colocadas sobre o formigón, e colocarase o novo, sobre rastreis e asentado nun conxunto de tiras de goma coas que se evitará a deformación da superficie e se garantirá unha mellor absorción dos impactos. Nas zonas anexas á cancha, nas que se desenvolven tamén habitualmente actividades deportivas, colocarase un novo pavimento sintético, desta volta cunha capa de impermeabilización por debaixo que lle dará maior durabilidade.

Moreda Gil recordou que o polideportivo municipal ten máis de trinta anos. “O Concello acomete moitos traballos de mantemento ao longo do ano, pero era precisa a colaboración da Deputación para afrontar unha intervención desta dimensión, polo que queremos unha vez máis agradecer o seu apoio a Cedeira”.

 

O ACENDIDO DAS LUCES, ESTE VENRES, MARCA TAMÉN O INICIO DA CAMPAÑA DE NADAL DO COMERCIO CEDEIRÉS

O Concello de Cedeira ten previsto acender as luces de Nadal o vindeiro venres, 2 de decembro, coincidindo co arranque da campaña do comercio da vila, que un ano máis vai poñer en marcha, coa colaboración da administración local, o reparto de rifas para o sorteo de 3.300€ en vales de compra. O alcalde, Pablo Diego Moreda Gil, destacou que “o alumeado vai chegar nestas festas a máis rúas e vai ser máis lucido que o ano pasado, para contribuír a dinamizar os negocios da localidade nestas datas tan importantes”. O acendido será ás 18.09 horas, coincidindo co ocaso.

As luces navideñas van alumear este ano máis zonas da vila, chegando ata as vivendas sociais, con especial incidencia nas zonas máis comerciais e o casco vello. A praza do Peixe contará cun abeto de luces de 17 metros de altura, en cuxa base haberá unha entrada e unha saída; na Praza Roxa instalarase un “photocall” con tres renos de diferentes alturas para que a xente poida poñer a súa faciana e facerse simpáticas fotografías; e na praza Marieta haberá un par de renos tirando dun trineo. A praza das Vivendas Sociais, a da Reitoral e o Parque dos Patos terán cadanseu árbore con estrelas.

Xunto con estes elementos, as rúas Real e do Cristo, no casco vello, cubriranse cun teito de luces, e distribuiranse arcos con diferentes elementos decorativos polas rúas da zona urbana e tamén nalgúns puntos do rural, así como adornos nas farolas dalgunhas vias. O proxecto de iluminacion inclúe tamén a colocación dunha decena de conos de diferentes alturas e unha bola de Nadal en 3D na nova praza pública situada xunto ao Pazo Moscoso. O Palacete adornarase cunha cortiña de luces na fachada e as árbores da alameda e da Praza Roxa resaltarán tamén con guirnaldas de luces.

A iluminación festiva funcionará desde o día 2 de decembro ata o 6 de xaneiro, o día de Reis, pero o apagado adiantarase dúas horas para moderar o consumo eléctrico. Tamén desde este venres ata a víspera de Reis, o 5 de xaneiro, un total de 175 establecementos comerciais de Cedeira repartirán rifas entre a súa clientela. Na campaña, segundo explicou Ana Bouza, da Asociación de Comerciantes de Cedeira, participan negocios de todo tipo, empresas de diferentes sectores, desde comercios de roupa e hostalería ata perruquerías, ferreterías e un longo etcétera.

O consumo nos establecementos adheridos á campaña levará aparellada unha rifa para entrar no sorteo que se celebrará o día 14 na Praza Roxa. Del sairá un primeiro premio de 500€, un segundo de 300€, seis premios de 200€ cada un e outros trece de 100€. Son, en total, 3.300€ en cheques para gastar ata o 28 de febreiro nas tendas participantes.

Ana Bouza explicó que o comercio de Cedeira porá todo o seu esforzo, un ano máis, en dinamizar a vila durante as festas navideñas. Como é xa habitual, decoraranse os escaparates con luces brancas e colocaranse alfombras vermellas e árbores de Nadal á porta das tendas. Todo para contribuír a crear o mellor ambiente para as compras, non só para a propia veciñanza senón tamén para as persoas que acoden á vila desde os municipios próximos.

O goberno local, que puxo xa en marcha hay un par de anos a imaxe de marca “Merca en Cedeira”, remarca nestas datas a importancia de apoiar ao comercio local, que ten por diante a campaña máis importante do ano.

CONCENTRACIÓN DE REXEITAMENTO Á VIOLENCIA MACHISTA NA PRAZA DO CONCELLO DE CEDEIRA

A corporación municipal de Cedeira secundou esta mañá unha concentración na praza do Concello con motivo do 25N, o Día Internacional pola Erradicación da Violencia Machista. No acto leuse un manifesto institucional no que se defendeu a igualdade e o respecto á diversidade, rexeitando calquera acto ou actitude de violencia contra as mulleres. Pola súa banda, o equipo “Faro da Igualdade” do IES Punta Candieira participou facendo unha performance que levaba por título “Somos as voces das que xa non poden falar”, en recordo das vítimas dos asasinatos machistas.

Tal como se expresou no manifesto, o acto tiña por obxectivo “recordar ás mulleres, nenos e nenas, persoas vítimas de violencia machista” e “reivindicar os dereitos das mulleres de vivir libres e sen violencias”. O ano pasado a tráxica conta da violencia machista era de 1.118 mulleres e 44 crianzas asasinadas –desde o ano 2003, cando empezaron a gardarse os datos- “e neste 2022 temos que sumar 38 feminicidios máis”. A corporación cedeiresa reivindicou que “como cidadanía temos que actuar e mirar de cara a esta inxustiza, pelexar e educar na igualdade de oportunidades” e recordou que máis aló dos asasinatos hai outras moitas violencias, física, psíquica, moral, sexual, económica, discriminación educativa, laboral e social, abusos e tratos degradantes. “Tamén temos o deber de responder a quen nega esta realidade social, banaliza e invisibiliza cos seus discursos a realidade de tanas mulleres”, afirmaba o manifesto, que remataba apuntando á responsabilidade das administracións públicas nesta materia.

A continuación, varias rapazas do equipo de igualdade do instituto protagonizaron unha acción moi impactante e emotiva. Situadas no chan sobre unhas siluetas que representaban a diferentes vítimas da violencia de xénero, cada unha delas foi tomando a palabra para expor brevemente a historia de cada unha, de casos reais de vidas arrebatadas polo machismo.

Esta tarde, a partir das 17.30 horas no Centro de Ocio Xuvenil, terá lugar unha merendacoloquio co equipo de igualdade do IES Punta Candieira. Nel participarán rapaces e rapazas de entre 12 e 18 anos, que charlarán sobre a presencia do machismo no adolescencia e de como eles e elas perciben a situación.