A COMPAÑÍA ELEFANTE ELEGANTE REPRESENTA EN CEDEIRA O ESPECTÁCULO CUBO PARA O PÚBLICO FAMILIAR

O público familiar é o destinatario do espectáculo teatral que programou o Concello de Cedeira para mañá sábado, día 2, a partir das 19.00h no Auditorio Municipal. A compañía Elefante Elegante porá en escena a obra Cubo, unha historia xurdida da situación de confinamento que trouxo a pandemia que fala da amizade, do impulso de descubrir mundos novos e da aventura de medrar.

Un cubo de dous por dous metros ocupa o escenario. Nel viven unha nena e un neno, interpretados por María Torres e Gonçalo Guerrero, aos que nun momento dado invade a curiosidade. Queren saír fóra, pero un pretende ir buscar preguntas, e o outro quere recoller respostas. Sempre foron quen de chegar a acordos, pero serán capaces de alcanzar un consenso desta vez?

A compañía Elefante Elegante foi creada no ano 2000 por María Torres e Gonçalo Guerrero. Residiu nos seus primeiros anos en Bélxica, ata que en 2007 se instalou en Galicia. Na súa traxectoria destaca o traballo co xesto e o movemento, na procura de espectáculos cunha linguaxe universal.

A obra Cubo está recomendada para nenos e nenas a partir de 4 anos. O prezo da entrada é de 2,5€.